Tekstsamandrag av filmen
På startplakaten står det "Produksjon av smør, instruksjonsvideo".
Maria Ballhaus, ystar ved Sogn Jord- og Hagebruksskule, står ved ei maskin og forklarer korleis ein lagar smør av rømme. Ho heller rømme frå ein bolle oppi ei kinne, som er ein større metallbehaldar. Behaldaren er kopla til ei sveiv. Ballhaus set eit lokk på kinna og begynner å sveive slik at behaldaren roterer.
Ho sluttar å sveive, opnar lokka og kikkar ned i kinna før ho set lokket på plass og tek til å sveive igjen.
På undersida av kinna er det ein kork. Når ho har sveivd ferdig, set ho ein glasbehaldar under og opnar korken. Kvit kinnemjølk renn ut.
Ho heller resten av innhaldet, som no har ein smøraktig farge og konsistens, ned i eit stort trau. For å vaske smøret fyller ho i vatn og begynner å kna det med ein trespade frå side til side i trauet. Etter ei stund heller ho vatnet ut av trauet og held fram omarbeidinga. Bit for bit trekker ho smør frå eine sida av trauet og presser det mot den andre sida for å fjerne det som er igjen av vatn. Før ho tilset salt, har smøret fått ein konsistens som gjer at ho kan elte det med hendene. Smøret blir fordelt utover botnen av trauet, og salt blir strøydd over. Deretter blir det elta saman igjen. Til slutt tek Ballhaus ein mindre kladd av smøret og pressar det ned i ei treform. Ho set denne inn i eit kjøleskap. Når han er ferdig kjølna, tek ho han ut og tippar den ferdig smørkladden ut på ei fjøl.
På sluttplakaten står det ystaren Maria Ballhaus, fagansvarleg Terje Røssland (Voss vgs.), takk til Sogn Jord- og Hagebruksskule, Økologisk landbruksskule. Produsert av Mediesenteret, Høgskolen i Bergen, 2012.