Helsefagarbeidar i ein pandemi

Koronaviruset som gir covid-19, er i stadig forandring. Sjølv om dei aller fleste i Noreg er vaksinerte mot koronavirus, vil viruset truleg påverke kvardagen vår i enno mange år. Som helsefagarbeidar er det viktig å ha kunnskap om sjukdommen og symptom. Vel så viktig er det at du har kompetanse om smittevern, opplevingane til pasienten i karantene og isolasjon og dessutan sjukepleietiltak ved covid-19.

Forsking har vist at isolasjon er negativt for den mentale helsa, noko som igjen kan påverke den fysiske allmenntilstanden til personen. Mange eldre og andre brukarar av helse- og omsorgstenester har over lengre tid vorte avskorne frå omverda på grunn av nedsett immunforsvar og underliggjande sjukdommar som aukar faren for alvorlege komplikasjonar ved sjukdommen covid-19.

Angst, apati og depresjon er negative konsekvensar av karantene eller isolasjon, anten det gjeld som preventivt tiltak eller på grunn av påvist covid-19. Nedsett matlyst og forvirring er andre aspekt ved å bli avskore frå kontakt med andre menneske.

Som helsefagarbeidar må du vere årvaken for atypiske infeksjonssymptom som forvirring, diffuse smerter, søvnvanskar, dehydrering og uro hos eldre. Du må i tillegg vere kjend med rutinar for rask testing, òg ved vage infeksjonssymptom.

Heimebuande brukarar som har fått stadfesta covid-19, bør observerast tett. Sjukdomsbiletet kan forandre seg hurtig til livstruande lungesvikt. I samråd med fastlege bør du som helsefagarbeidar vere informert om hyppigheit og innhald i oppfølginga. Den generelle helsetilstanden og vaksinestatusen til pasienten og alvorsgraden av sjukdommen vil påverke oppfølginga.

Høg kompetanse om grunnleggjande smittevernrutinar er essensielt for deg i arbeid med pleie og omsorg for brukarar, både for å unngå å bli smitta sjølv og for å unngå å smitte andre.

Fleire kommunar har teke i bruk velferdsteknologi og digitale verktøy under covid-19-pandemien. Dette er hjelpemiddel som bidreg til auka tryggleik og meistring for tenestemottakarane og til betre kvalitet og redusert ressursbruk for helsetenesta. Du som helsefagarbeidar må derfor tileigne deg kompetanse om aktuelle løysingar, som til dømes elektronisk medisineringsstøtte, digitalt tilsyn og bruk av videosamtalar. Nødvendig kompetanse om dette er viktig for å kunne rettleie og informere pasienten i bruk av slike verktøy.