Vilt

For å framheve den gode smaken av vilt kan vi med fordel nytte råvarer og krydder frå skogen, som tyttebær, einebær, blåbær og bringebær eller sopp. Vilt passar òg godt saman med andre typiske haustråvarer som rotgrønsaker, eple og pærer.

Viltkjøt inneheld protein av høg kvalitet, B-vitamin og er ei god kjelde til sink og jern, og det gir òg noko kalium. Reinsdyrkjøt har nesten tre gonger så mykje jern som storfekjøt, noko som blir vist i den djupe raudfargen. Viltkjøt har generelt lite feitt, som regel ikkje meir enn tre prosent. Aller magrast er hjorte- og elgsteik.

Elgkjøtet har ein mild og avrunda viltsmak, og det er eit allsidig kjøt som blir nytta til både kvardags og fest. Storleiksmessig kan elgen samanliknast med storfe, og dei blir delte opp etter same prinsipp. Elgjakta i Noreg er frå 25. september til 23. desember, med nokre lokale variasjonar.

Hjortekjøtet har ein litt kraftigare viltsmak enn elgkjøtet, men smaker mildare enn til dømes reinsdyr. Laga riktig er det mørt og saftig, med finare fiberstruktur i kjøtet enn elg. Jaktsesongen er frå 1. september til 23. desember.

Vi har både tamrein og villrein i Noreg, men det er lite som skil dei smaksmessig. Reinsdyr har kraftig viltsmak, og strukturen minner om hjortekjøt. Slaktesesongen er frå september til mars, jaktsesongen er frå 20. august til 30. september.

Rådyr er det minste hjortedyret vårt og har mildt, smaksrikt og mørt kjøt. Storleiken på dyret gjer at vi som oftast nyttar heile delar av dyret, som lår, bog og sal, framfor dei mindre stykka. Frå 25. september til 23. desember er det ope for ordinær rådyrjakt.

Harekjøt er mørkt og magert med ein kraftig viltsmak. Jakttida er frå 10. september ut februar, med nokre lokale variasjonar.

MatPrat. (2020). Oppdelingsguiden. https://www.matprat.no/oppdelingsguiden/