Skape forventningar
Ei forventning er ei førestilling om eller eit bilete av korleis ein bestemt ting eller situasjon vil utvikle seg. Når ein gjest les ein meny, vil han eller ho få ei forventning til kva slags type etestad det er, kva type råvarer som blir nytta, korleis servicen og prisnivået er, korleis interiøret er, og så vidare.
Ein meny som er gjennomtenkt, kan freiste gjesten til å bestille meir enn han eller ho i utgangspunktet hadde tenkt. Ein meny bør ha gode og detaljerte beskrivingar, slik at forventningane til gjesten stemmer overeins med det som blir presentert på tallerkenen. Du bør likevel ikkje overdrive. Viss du beskriv rettane som "himmelske munnfullar", "den beste pizzaen i byen" eller liknande, skaper du forventningar som det kan vere vanskeleg å innfri. Og dersom gjesten ikkje får innfridd forventningane sine, vil han eller ho sitje att med eit dårleg inntrykk.
Spegle atmosfæren og konseptet til staden
Menyen bør vere tilpassa den aktuelle serveringsstaden. Vi forventar at ein eksklusiv restaurant og ein enkel kafé har ulike typar menyar. Plasseringa til etestaden kan òg skape forventningar til kva slags råvarer som blir serverte. Viss restauranten ligg i sjøkanten, vil gjestane forvente at her blir det servert sjømat. Det vil dei sannsynlegvis ikkje gjere på eit høgfjellshotell.
Informere om prisnivå
Ein meny oppgir alltid prisane for dei ulike rettane. Denne informasjonen er viktig for gjesten og gir ein peikepinn om kva slags kvalitet ein kan forvente, når det gjeld både mat og service. Stemmer prisnivået med det gjesten hadde sett for seg, bestiller og betaler han eller ho utan å sitje att med kjensla av at dette vart for dyrt. I motsett fall vil gjesten sannsynlegvis ikkje kome tilbake.
Vere salsverktøy
Måten vi set opp menyen på, har noko å seie for kor lønsam han blir. For å auke lønsemda bør vi framheve dei rettane som gir høgast bidrag, og byggje opp menyen slik at det skaper meirsal av forrettar, dessertar og drikkevarer. Ein gjest som i utgangspunktet berre hadde tenkt seg ein hovudrett, endar kanskje opp med både forrett og dessert fordi menybeskrivinga var så freistande.
Vere garantist for kvalitet
Beskrivinga i menyen fungerer som ein garantist for kvalitet. Viss retten eller servicen ikkje samsvarer med det som er beskrive i menyen, har ikkje gjesten fått det han eller ho har bestilt og betalt for. Dermed kan gjesten klage og vise til det som står i menyen.
Fortelje historia til etestaden
Menyen kan vere med på å fortelje historia til etestaden, som kan vere sann eller ganske enkelt oppdikta. Ei historie om etestaden er ein del av konseptet til staden, og blir ofte spegla i menyen. Ei fengjande historie appellerer til gjesten og er med på å gi gjesten ei god og unik oppleving.