Personleg verneutstyr ved bruk av vinkelslipar
Personleg verneutstyr
Dette personlege verneutstyret må du bruke når du skal bruke ein vinkelslipar:
heildekkande arbeidsklede
vernesko
arbeidshanskar
vernebriller
høyrselsvern
Viss du jobbar på eit område med dårleg lufting, eller viss du sliper på materiale som er overflatebehandla og eller gir frå seg gassar, er det viktig at du nyttar støv- eller kolfiltermaske.
Det finst eigne påbodsskilt som gir informasjon om påkravd verneutstyr.
Heildekkande arbeidsklede
Du må bruke heildekkande arbeidsklede med tettsitjande erme, eventuelt mansjettar. Fordi du jobbar med roterande maskiner, er det viktig at kleda er tettsitjande. Viss dei er for lause, er det fare for at lausthengande delar kan vikle seg inn i dei roterande delane.
Vernesko
Når du jobbar i ein dreiebenk, nyttar du tunge verktøy og arbeidsstykke. Derfor er det viktig å verne føtene dine viss du er uheldig og mistar noko.
Arbeidshanskar
Når du jobbar med sponfråskiljande arbeid, er det viktig å verne hendene mot spon og gneisteregn som kan ha høg temperatur. Du må derfor nytte hanskar som toler høg temperatur.
Du vernar òg hendene mot kutt, for slipte delar kan ha skarpe kantar og overflater. I tillegg bidreg hanskane til at du får eit godt grep rundt vinkelsliparen.
Vernebriller
Ved sponfråskiljande arbeid er det eit risikomoment at bearbeidinga fjernar materiale frå eit arbeidsstykke, og dette materialet kan kastast ut i lufta og treffe auga. Slikt materiale er ofte varmt, og det kan brenne seg fast i auget.
Ved kraftig gneistesprut kan det vere formålstenleg å byte ut vernebriller med eit visir.
Høyrselsvern
Når du jobbar med ein vinkelslipar, vil det oppstå skadeleg støy, og du må nytte høyrselsvern for å verne høyrselen din.
Det er viktig at du bruker høyrselsvern som er godkjent for bruk på verkstad.
Kontrollspørsmål
Svar på kontrollspørsmåla.