Kundane tek for gitt at ei transportteneste er trygg. For at ein transport skal vere trygg, må ei rekkje krav vere oppfylte, til dømes:
- Føraren må vere utkvilt.
- Føraren må ikkje vere påverka av alkohol.
- Køyretøyet må vere i forskriftsmessig stand (bremser, dekk og liknande).
- Farten må vere avpassa trafikkmiljøet.
Kravet til at det skal vere trygt å bruke varer og tenester, er så viktig at styresmaktene har lovregulert det. Slike sikkerheitskrav er fordelte på mange lover og forskrifter, og det er ikkje alltid like lett å vite kva krav som gjeld. Vi har også plikt til sjølv å setje oss inn i vedtaka og følgje dei.
For det første må vi opptre i samsvar med vedtaka i veitrafikklova med alle forskriftene der. Mange av desse vedtaka lærer du om under føraropplæringa. For det andre må vi opptre i samsvar med helse-, miljø- og sikkerheitslovgivinga. Her finn vi viktige krav i
- arbeidsmiljølova (reglar om vern av arbeidstakarar mot skadar)
- ureiningslova (reglar om vern av det ytre miljøet og forsvarleg avfallsbehandling)
- brann- og eksplosjonsvernlova
- matlova (reglar om matvaresikkerheit)
Alle bedrifter er i dag pålagde å ha eit internkontrollsystem med prosedyrar og retningslinjer som dei tilsette skal følgje for å sikre trygge tenesteleveransar.