Les artikkelen nedanfor, og reflekter over kva leiarar har å seie for ein bedriftskultur.

Sjå filmen "Hva skjer når de ansatte får være med å utvikle arbeidsplassen?".

• Kva kjenneteiknar bedriftskulturen til Madshus?
• Kva betyr det for bedriftskulturen at dei tilsette har ei reell moglegheit til å vere med og bestemme utviklinga av bedrifta?

Sjå filmen "Helsefremmende arbeidsplasser".

• Forklar korleis trivsel på jobb kan gi betre helse, og korleis betre helse kan påverke bedriftskulturen.

Ein god bedriftskultur bidreg til å skape motiverte og lojale medarbeidarar. Det kan vere til hjelp om bedrifta opplever motgang.

Sjølv om alle tilsette må bidra for å skape ein god kultur, har leiinga eit stort ansvar. Leiarane kan synleggjere den ønskte bedriftskulturen ved sjølve å vere gode førebilete, slik at det blir bygd opp gode haldningar og eit positivt verdisyn. Ein slik prosess kan vere ein del av personalpolitikken.

Det vil sjølvsagt vere stor forskjell på korleis leiing, samarbeid og bedriftskultur er i store og små bedrifter. Det er lettare å endre ein bedriftskultur i ein liten enn i ei større bedrift – både i positiv og i negativ retning.

Det betyr mykje at dei tilsette får bidra med synspunkt og vere med på å bestemme forhold som har med arbeidet deira å gjere. Det bør òg vere rom for at dei tilsette trygt kan seie frå om dei er ueinige med leiinga, men det bør gjerast på ein ordentleg måte. Leiinga bør på si side tole kritikk, utan automatisk å gå i forsvarsposisjon.

Ein god bedriftskultur kan gi dei tilsette betre helse. Har ein hyggjelege kollegaer, imøtekomande leiarar og meiningsfulle arbeidsoppgåver, kjenner ein seg òg mindre sjuk.