Kva er bakgrunnen for innvandring til Noreg? Som du har sett, kan det vere både i form av arbeidsinnvandring eller som flyktningar og asylsøkjarar. Her skal du sjå litt bak tala og også undersøkje meir om ein innvandrar frå eit valt land.
Oppgåve 1:
Studer grafen frå SSB. Han viser innvandringsgrunn frå 1992 til 2019. Hugs at du òg kan føre pila over grafen for å sjå nærare på tala.
- Ut i frå grafen, kva er grunnen til at flest har komme til Noreg dei siste åra? Kvifor er det sånn, trur du? Finn ekstrainformasjon som gjer at du kan forklare tala.
- Det er tre store toppar for innvandring på bakgrunn av flukt. Sjekk grafen for flukt, finn ut kva år det var og kva som skjedde i verda som gjorde at ein fekk desse toppane av flyktningar.
- Grafen frå SSB går tilbake til 1992, men det har komme innvandrarar til Noreg av ulike årsaker i lang tid. Finn ut når dei første flyktningane kom til Noreg, og kva som var årsaka til at dei kom.
Oppgåve 2:
Du skal no lage ein presentasjon av innvandrarar frå eit valt land. Du skal ha med noko fakta om bakgrunnen for innvandringa og dessutan om kulturen til dei som bur i Noreg i dag.
Du kan velje land ut i frå din eigen bakgrunn eller eit land, folk og kultur du er nysgjerrig på.
Dette er nokre spørsmål du bør finne svar på:
- Kva er bakgrunnen for innvandringa frå dette landet?
- I kva periode kom det flest til Noreg?
- Kor mange innvandrarar frå ditt valde land bur i Noreg i dag? Her kan du gjerne òg ta med norskfødde med innvandrarforeldre.
- Er det mange truande frå dette landet? Kva tru vedkjenner i så fall dei fleste seg?
- Kva for nokre kulturelle kjenneteikn er vanleg for denne innvandrargruppa? Mat, klede, familieforhold m.m.
- Er det stor forskjell på kulturen i landet dei kjem frå og den kulturen dei praktiserer her i Noreg?
CC BY-SASkrive av Inga Berntsen Rudi.
Sist fagleg oppdatert 12.06.2020