Personleg verneutstyr

Dette personlege verneutstyret må du bruke når du jobbar med ei bandsag:

• heildekkande arbeidstøy

• vernesko

• vernebriller

• hanskar

Det finst også eigne skilt som gir informasjon om påkravd verneutstyr. Klikk på biletet for å lese meir om verneutstyret og skilta – eller les fagteksten nedanfor.

Heildekkande arbeidstøy

Heildekkande arbeidstøy vernar huda mot varme spon frå arbeidsstykket.

Arbeidstøyet må vere av eit sterkt materiale som kan verne deg mot kutt frå plater med skarpe kantar.

Arbeidstøyet må også vere tettsitjande. Bruker du laustsitjande klesplagg, risikerer du at dei viklar seg inn i dei roterande delane på maskina.

Påbodet om å bruke heildekkande arbeidstøy er varsla med eit rundt skilt som viser ein kvit, heildekkande kjeledress på blå bakgrunn.

Vernesko

Når du bruker ei bandsag, jobbar du ofte med tunge verktøy og arbeidsstykke. Det er derfor viktig at du bruker vernesko for å verne føtene dine i tilfelle du er uheldig og mistar noko.

Påbodet om å bruke vernesko er varsla med eit rundt skilt som viser ein blå og ein kvit vernestøvel på blå bakgrunn.

Vernebriller

Når du jobbar med ei bandsag, er det fare for at spon eller materiale frå arbeidsstykket blir kasta ut i lufta og treffer auga dine. Dette materialet er ofte varmt og kan brenne seg fast i auget. Derfor må du bruke vernebriller.

Det er også viktig at auga er verna viss det oppstår ein skade på sagbladet eller maskina.

Med vernebriller vernar du også auga mot sprut frå kjølevæska.

Påbodet om å bruke vernebriller er varsla med eit rundt skilt som viser eit kvitt omriss av hovudet til ein person som har på seg vernebriller, på blå bakgrunn. Brillene vernar auga både framanfrå, ovanfrå og frå sidene.

Arbeidshanskar

Når du jobbar med metall og skjerande verktøy, er det viktig at du bruker hanskar slik at du ikkje skjer deg på tennene på sagbladet eller på skarpe kantar på arbeidsstykket.

Hanskane vernar også huda di mot kjemikala i kjølevæska. Viss hanskane blir våte av kjølevæske, er det viktig å skifte hanskar slik at huda di ikkje er i konstant kontakt med kjemikala i kjølevæska.

Påbodet om å bruke arbeidshanskar er varsla med eit rundt skilt som viser ein kvit og ein blå hanske på blå bakgrunn.