Introduksjon benkslipar
Kvifor treng du sikkerheitsopplæring?
Vi bruker benksliparen til å slipe i metall. Slipeskivene på ein benkslipar roterer med veldig høg fart, og bruk av benksliparen kan vere farleg. Det er derfor viktig at du kjenner til dei ulike risikomomenta, verneinnretningane og HMS-krava for maskina.
Benksliparen er vanlegvis utstyrt med to roterande slipeskiver som står på kvar si side av motoren, og tilarbeidingsmetoden blir kalla sponfråskiljande tilarbeiding.
Gjennomføring
For å få sikkerheitsklarering må du gjennomføre ei teoretisk og ei praktisk opplæring. Du må bevise for læraren at du kjenner til risikomomenta og nødvendig verneutstyr, og at du veit korleis verneinnretningane på maskina fungerer.
Når du har sett deg inn i den teoretiske delen, tek du kontakt med læraren din for ein praktisk demonstrasjon. Læraren avgjer så om du har tilstrekkeleg kompetanse til å betene maskina.
Framgangsmåte
Gjennomfør den teoretiske opplæringa.
Svar på kontrollspørsmåla til teoristoffet.
Gjer deg kjend med benksliparen de har på verkstaden.
Skriv ut, fyll inn og signer eigenerklæringsskjemaet som ligg på denne sida.
Ta kontakt med læraren og lever skjemaet.
Demonstrer for læraren at du også i praksis har kunnskapen og ferdigheitene som trengst for å betene maskina på ein sikker måte.
Læraren vurderer deg og gir deg sikkerheitsklarering ved å signere på eigenerklæringsskjemaet ditt.