Symptom på svekking av musklar kan vere
at muskelmassen minkar
at muskelkrafta blir svekt
vekttap
Symptom på svekking av skjelett kan vere
auka tendens til brot
Symptom på feilstillingar i ledd kan vere
nedsett rørsleevne i ledda
stive ledd
smerter i ledd
synlege feilstillingar
Ved immobilitet vil muskelmassen raskt minke, og då vil muskelkrafta gradvis bli svekt. Skjelettet taper kalsium, protein og fosfor når aktivitetsnivået blir lågt, og ein følgetilstand av dette kan bli osteoporose .
Når musklane ikkje blir brukte, vil rørsleevna i ledda minke og dei blir stive. Fordi bøyemusklane er sterkare enn strekkemusklane, vil ledda stivne i bøygd stilling.
Aktivitet
Ein fysioterapeut kan setje opp individuelle treningsprogram for immobile pasientar. Pasientar med avgrensa immobilitet kan gjere aktive øvingar. Det er då viktig å ta utgangspunkt i ressursane og interessene til pasienten. Dersom pasienten er avhengig av hjelp til mobilisering, må helsepersonell hjelpe pasienten med passive øvingar. Øvingane bør gjerast fleire gonger per dag.
Kosthald
Eit sunt og næringsrikt kosthald vil gi pasienten energi til aktivitet.
Sidan skjelettet taper kalsium og protein ved inaktivitet, bør kosthaldet innehalde matvarer som er rike på kalsium og protein. Kalsiumrike matvarer er mjølk og ost, bønner, brokkoli, kål og feit småfisk.
Vitamin D aukar opptaket av kalsium. Sollys og tran er gode D-vitaminkjelder. Protein finst i matvarer som egg, kjøtt, fisk og meieriprodukt. Korn, erter, bønner og linser inneheld òg rikeleg med protein.
Hjelpemiddel
Det finst mange hjelpemiddel å få som er utvikla med tanke på å førebygge svekking av musklar og skjelett, og som førebygger feilstillingar i ledd. Ein fysioterapeut eller ein ergoterapeut kan hjelpe til med å finne fram til eigna hjelpemiddel.
Utfordringar til deg
Forklar desse begrepa
- osteoporose
- kontraktur
- komplikasjon
Kvar kan ein søke om hjelpemiddel?
Kva hjelpemiddel kjenner du til som kan bidra til auka aktivitet, og dermed førebygge svekking i musklar og skjelett?