Ergonomi for barne- og ungdomsarbeidaren

Opne bilete i eit nytt vindauge

CC BY-NC

Bilete: Kentaroo Tryman

Barne- og ungdomsarbeidaryrket er eit praktisk yrke der du bruker kroppen din i yrkesutøvinga. I arbeidet vil du ha fysisk nærkontakt med barn. Barn ønskjer å bli løfta for å få ein klem eller trøyst. Du må òg kunne hjelpe barn med bleieskift og når dei skal på toalettet, i på- og avkledning, under måltid og i sove-/kvilesituasjonar. Du må kunne delta i leik og ulike aktivitetar. Det er derfor viktig at du tek vare på eigen kropp og helse slik at du klarer å utføre arbeidsoppgåvene dine.

Ergonomi handlar om korleis du bruker kroppen når du utfører arbeidsoppgåver. God ergonomi bidreg til ein sunn fysisk aktivitet i ein kvardag saman med barn og gir auka motivasjon i dette arbeidet.

Bruke kroppen på ein god måte (ergonomiske prinsipp)

Du må vite korleis du kan bruke kroppen din på ein god måte, og korleis du kan ta vare på han. Å bruke kroppen riktig handlar om å følgje dei naturlege rørslemønstera, slik du gjer når du står, går og reiser deg. Då har hovud, skulder og rygg mest mogleg normalstilling. Gode arbeidsstillingar er når ledda er i midtstilling. Å variere arbeidsstilling er naudsynt for å unngå einsidig belasting på musklar og ledd. Du må sørgje for å endre arbeidsstillingar undervegs og ta små og korte pausar i gjennomføringa av arbeidet ditt.

Trening og avspenning

Trening bidreg til at du styrkjer ledd, musklar og sener. Ein sterk kropp toler meir, og faren for slitasje blir mindre. Trening vil òg bidra til at du får meir uthald i arbeidet ditt.

Avspenningsøvingar gjer at musklane slappar av og kan bidra til å løyse opp stramme musklar og til å dempe stress. Avspenningsøvingar bidreg òg til betre velvære og oppleving av ro.

Som barne- og ungdomsarbeidar har du ansvar både som rettleiaren til barna og som rollemodell for å hjelpe barn til å ta vare på eigen kropp. Du må tenkje på kva du seier og kva du gjer for å ta vare på eigen kropp, og bruke han riktig. Dette må du òg tenkje på når du rettleier barna i å ta vare på eigen kropp. Å reflektere over eigne haldningar og korleis den praktiske utøvinga di vil verke for barna, bidreg til at du blir medviten kva som er riktig å gjere med tanke på ergonomi og det å ta vare på eigen kropp.

God tilrettelegging av arbeidsplassen er med på å førebyggje muskel- og skjelettplager. Det er lettare å førebyggje enn å reparere allereie oppståtte skadar. Muskel- og skjelettplager er ei fellesnemning for smerter/ubehag i musklar, sener, ledd eller nervar. Det kan føre til redusert funksjonsnivå. Ugunstige arbeidsstillingar, repeterande rørsler og tunge løft er døme på mekanisk arbeid som finst på ei rekkje arbeidsplassar.