Klargjering av behandlingsrom og unit

Desinfeksjon

Målet med desinfeksjon er å drepe sjukdomsframkallande mikroorganismar slik at dei ikkje kan overføre smitte. Vi desinfiserer på ulike måtar:

Varmedesinfeksjon

Ved varmedesinfeksjon bruker vi vatn og damp for å drepe mikroorganismar. Temperaturen på vatnet må vere minst 85 gradar i fem til ti minutt i dekontaminator eller desinfektor.

Kjemisk desinfeksjon

Ved kjemisk desinfeksjon arbeider vi med antiseptisk teknikk. Det betyr at vi bruker desinfiserande kjemikal på alle synleg reine overflater som toler alkohol, for å drepe mikroorganismar. Etter kvar pasient desinfiserer vi uniten med overflatedesinfeksjon 75 prosent. (Unit eller tannlegeunit er tannlegestolen med tilhøyrande instrument og utstyr, altså heile behandlingseininga). For at desinfeksjonen skal ha optimal effekt, bør overflata vere fuktig i minst to minutt. Dette sikrar at desinfeksjonsmiddelet får tilstrekkeleg verketid til å inaktivere mikroorganismar.

Film om klargjering av rom og utstyr

I denne filmen (lengde 9:23) ser vi korleis behandlingsrom og unit blir klargjorde.

Klargjering av behandlingsrom

Bruk hanskar under arbeidet.

• Sorter og rydd behandlingsutstyret på brettet (sorter i fleir- og eingongsbor).

• Tørk av kompositt eller sement ved behov før det herdar.

• Kast alt eingongsutstyr, og ta resten av utstyret med til sterilrommet.

• Kast alle spisse/skarpe gjenstandar som skalpellar og sprøytespissar i gul boks for risikoavfall.

• Set instrumenta rett i dekontaminator.

• Hugs handhygiene før du forlet sterilrommet.

Desinfeksjon av unit og tannlegestol

Bruk nye hanskar og ta så mange spritklutar (kompressar fukta med desinfeksjonsmiddel) som du har bruk for, ut av behaldaren på ein gong. Desinfiser deretter i denne rekkefølga:

• arbeidsbenken og handtak på skuffer og skap

• røntgenapparat, røntgenkonus, blykrage og eksponeringsknappen

• lampehandtak med brytaren og glaset

• pasientlenke

• heile tannlegestolen frå nakkestøtte til fotstøtte

• instrumentbordet over, på sida og under. Deretter spritar du av instrumentbrygga med trevegssprøyte, turbin og mikromotorar, slangar og panel.

• fontenedelen av uniten, òg kalla sugeanlegget, med beteningspanel, sugeslangar og haldarar

• utsida av spyttfontena, vassdispenser og innsida av spyttfontena