Praktisk hjarte- og lungeredning
Kva er hjarte- og lungeredning (HLR)?
Hjarte- og lungeredning (HLR) er ein førstehjelpsteknikk vi bruker når ein person har slutta å puste, eller når hjartet har slutta å slå. HLR består av to hovuddelar: brystkompresjonar og munn-til-munn-metoden.
Formålet er å sikre oksygentilførsel til hjernen og andre vitale organ.
Korleis utføre hjarte- og lungeredning
Kontroller om den skadde pustar: Viss personen er medvitslaus og ikkje pustar normalt, må du starte HLR.
Start med brystkompresjonane: Legg begge hendene oppå kvarandre på midten av brystet.
Trykk hardt og djupt, omtrent 5–6 cm ned kvar gong.
Utfør 30 brystkompresjonar i eit tempo på cirka 100 kompresjonar per minutt.
Slipp heilt opp etter kvar kompresjon for å la brystkassa komme tilbake til opphavleg posisjon.
Munn-til-munn-metoden
Etter 30 brystkompresjonar bøyer du hovudet til personen forsiktig bakover med ei hand på panna.
Klem nasebora saman med fingrane på same hand.
Legg munnen din tett rundt munnen til personen og pust ut for å fylle lungene til personen med luft.
Du skal gi to innblåsingar over to sekund.
Du skal kunne sjå brystkassa heve seg når du pustar inn luft.
Etter to innblåsingar gjer du 30 brystkompresjonar igjen.
Hald fram med denne prosessen til du ser teikn på liv, som at personen begynner å puste, eller til ambulansepersonell tek over.
Når du får hjelp
Viss det er fleire personar tilgjengeleg, bør de byte på oppgåvene slik at éin person gjer brystkompresjonar mens ein annan gir innblåsingar. Dette gir betre effekt og held energinivået oppe for begge involverte.
Refleksjonsspørsmål
Kvifor er brystkompresjonar så viktige for å redde liv?
Kva bør du gjere viss du ser at personen begynner å puste normalt under HLR?
Kva kan du gjere viss du er åleine og ikkje har nokon til å hjelpe deg med innblåsingar?
Test deg sjølv
Svar på spørsmåla for å sjå kva du har lært.