Lysbogeskadar

Kva er lysbogeskadar, og korleis blir dei handterte?

Ein lysboge oppstår når elektrisk straum passerer gjennom luft, og skaper eit intenst, lyssterkt fenomen som kan vere svært farleg. Lysbogen utviklar ekstrem varme og kan føre til skadar på huda, auga, høyrselen og pustesystemet. Lysbogeskadar krev rask handling, og det er viktig å forstå korleis ein skal behandle desse skadane for å minimere langvarige effektar.

Augeskadar frå lysboge

Auga er svært utsette for lysbogar, for det kraftige lyset frå lysbogen kan forårsake brannskadar på auga, og metallpartiklar kan komme inn i auga. Det første ein skal gjere ved ein augeskade, er å dekke til auget med ein rein bandasje for å hindre infeksjon og forhindre rørsle av auget. Dette kan elles forverre skaden.

Viss det er ein framandlekam i auget, skal begge auga bli dekte til, fordi det skadde auget kan følge rørslene i det friske auget. Det kan forverre skaden.

Høyrselsproblem frå lysboge

Ein lysboge skaper òg eit høgt smell som kan skade dei indre strukturane til øyret. Trommehinna kan sprekke, og den indre delen av øyret kan bli skadd, noko som kan føre til kraftig smerte og mellombels eller permanent høyrselstap.

Personen som har vore utsett for lysbogen, kan ha problem med å høyre. I nokre tilfelle kan personen vere heilt døv etter ei slik hending. Det er lite ein kan gjere for å behandle høyrselstap på staden, men rask sjukehusbehandling er nødvendig for å vurdere omfanget av skaden.

Skadar på pustesystemet

Lysbogen kan òg produsere varme metallgassar som kan forårsake alvorlege brannskadar i luftvegane. Dette kan føre til at luftvegane hovnar opp, og den skadde kan få pustevanskar eller til og med bli kvelt. I slike tilfelle er det viktig å vere førebudd på å assistere pustinga ved å utføre munn-til-munn-metoden.

Teikn på luftvegsskadar etter lysboge:

• forbrenningar i ansikt og på hals

• sot rundt munnen og i spyttet

• hovne lepper og svidde nasehår

• hosting, hås stemme

• uvanlege lydar frå lungene ved pusting

• medvitsløyse

Test deg sjølv

Svar på spørsmåla for å sjå kva du har lært.