Filmressursar om Deploii
Filmsamling
Denne filmsamlinga viser korleis Deploii kan setjast opp, korleis du kan programmere utviklingskortet ditt, og praktisk bruk av systemet.
Du finn òg innhaldet i filmane som ein teoretisk hurtigguide her på NDLA.
Film 1: Introduksjon og innlogging
Denne filmen (lengde 1:20) gir deg ein introduksjon til Deploii og ein guide til korleis du skal logge inn på nettsida til Deploii.
Film 2: Installasjon og oppsett i Arduino IDE
For å kunne kommunisere med Deploii må du programmere utviklingskortet ditt (mikrokontrollaren) med Arduino IDE, slik at kortet og Deploii snakkar same språk. Du må derfor installere rett bibliotek og rett versjon av kortinformasjon gjennom Board Manager. I denne filmen (lengde 2:05) får du informasjon om korleis du gjer dette.
Film 3: Omgrep
På nettsida for Deploii og ved programmering av utviklingskortet ditt i Arduino IDE vil du møte ein del fagomgrep. I denne filmen (lengde 7:13) blir desse omgrepa forklarte, slik at du enklare kan forstå korleis programmering og kommunikasjon mellom kort og Deploii fungerer.
Film 4: Utviklingskort
For å hente inn data frå ulike sensorar er du avhengig av eit utviklingskort (kort) av typen Arduino eller ESP32, som kommuniserer via wifi eller GSM-nettet. I denne filmen (lengde 2:26) får du ein gjennomgang av nokre av dei ulike korta som er eigna til denne bruken.
Film 5: Datastraum
Data som blir sende mellom kortet og Deploii, blir sende via datastraumar. Dette er ei spesifikk kommunikasjonslinje du sjølv set opp i programvara. Denne datastraumen er unik for kortet ditt og brukaren din på Deploii. Kva ein datastraum er, og korleis han blir definert, får du ei god innføring i gjennom denne filmen (lengde 2:06).
Film 6: Måleserie
Når du set opp kommunikasjon mellom kort og Deploii, blir data sende på same måte som om du til dømes strøymer ein film på Netflix. Når dataa er lesne, blir dei borte. For å lagre desse dataa for seinare bruk må du opprette ein såkalla måleserie. Ein måleserie lagrar data frå ein tidsperiode eller lagrar eit bestemt tal måleverdiar. Korleis du set opp dette, og kva du kan bruke desse dataa til, får du informasjon om i denne filmen (lengde 5:24).
Film 7: Kontrollpanel
Å få data på ei nettside er lite fruktbart viss du ikkje får dei presenterte på ein nyttig måte. I denne filmen (lengde 12:05) får du informasjon om korleis du kan setje opp eit grafisk grensesnitt, eit kontrollpanel. I kontrollpanelet kan du velje om dataa skal visast som tal, grafar eller på andre måtar, og du kan i tillegg sende informasjon og kommandoar tilbake til kortet.
Film 8: Demonstrasjon
Når du har sett opp og programmert kortet rett, lagt til sensorar og kopla opp kortet mot Deploii via wifi, er du klar til å bruke systemet.
I denne filmen (lengde 12:19)får du ein praktisk demonstrasjon av korleis systemet fungerer.