Fagstoff

Brukar og språk i Deploii

I Deploii finn du profilen din via menyen øvst til høgre. Her kan du sjå og redigere informasjon, få brukarstøtte eller forandre innstillingar. Du kan òg byte språk på nettsida, og lærarar/administratorar får eigne verktøy for administrasjon.

Deploii-profilen din

I øvre, høgre hjørne finn du ein sirkel med initialane dine og ein nedtrekksnapp. Bruker du denne, får du opp to alternativ: gå til profilen din, som i biletet under, eller logg ut.

Profilsida viser informasjon om deg henta frå Feide, som fylke og skule, eller informasjon som du sjølv har lagt inn dersom du har ein privat brukar. Etter kvart vil ho òg kunne vise informasjon som er relevant for brukaren din på Deploii.

Skjermbilete frå programvara Deploii som viser profilinformasjon for ein lærar. Skjermutklipp. — Her ser du eit døme på korleis brukarsida ser ut viss du er logga inn med Feide.

Alle brukarar

Alle brukarar har tre undersider, "Profilen min", "Brukerstøtte" og "Innstillinger". Brukarstøtte vil fortelje deg korleis du kan få hjelp om du meiner noko er feil med Deploii/nettsida. Her kan du hente ut brukar-ID tilknytt kontoen. Denne kan du sende til Company of Things, som står bak nettstaden, viss det er noko feil, så kan dei hjelpe deg.

Under innstillingar er det foreløpig berre éin funksjon, og det er at du som brukar kan slette all informasjonen som er lagra om deg i databasane til Company of Things. Viss du gjer dette, vil alle dataa dine bli sletta, inkluderte måleseriane dine. Viss du er knytt til Feide og slettar brukaren din, kan du likevel framleis logge inn igjen og setje opp alt på nytt. Dette er fordi Deploii automatisk hentar tilbake igjen info om deg frå Feide.

For lærarar og administratorar

For lærarar

Er du lærar, underviser, administrator ved skulen/fylket eller liknande, vil du kanskje få opp to undersider til for administrasjon. Deploii gir deg full oversikt over både brukarar (elevane dine) og grupper (faga eller skulen din) frå Feide. Her vil du kunne tildele lisensar, slette brukarar, aktivere deling av data mellom brukarar i same gruppe og så vidare, viss du har tilgang til dette.

Administratorar

Deploii vil normalt ikkje styre kven som er administratorar av dei ulike gruppene, fordi dette blir importert rett frå Feides database. Du kan få tilsendt ei eiga brukarrettleiing for administratorar ved å kontakte Company of Things eller Deploii-ansvarlege frå fylkeskommunen (denne ligg ikkje på nettet, men blir delt direkte med fylka/skulane).

Språk

Til venstre for profil-knappen er det ein annan nedtrekknapp. Denne let deg velje språk på nettsida. Førebels er bokmål, nynorsk og engelsk støtta. Skiftar du språk, vil dette òg kunne påverke kode-døme.

Skriftlege guidar og videoar, som ikkje ligg på nettsida, vil som oftast vere på bokmål. Mykje av denne plattforma bruker konsept som ofte stammar frå engelsk.

Skulle du komme på gode norske ord som vi ikkje har brukt, ta gjerne kontakt med NDLA eller Company of Things og gjer oss merksame på desse!

Skjermbilete frå programvara Deploii som viser ein nedtrekkmeny med vala bokmål, nynorsk og engelsk. Skjermutklipp. — I Deploii kan du byte språk når som helst, uansett kva underside du er på.

Ver merksam på at alle språk bortsett frå bokmål vil påverke nettsida sin URL.