Fagstoff

Interaktivt innhald

Oppsett på nettsida

I Deploii set du opp kort, datastraumar, måleseriar og kontrollpanel for å samle inn og styre data. Her viser vi steg for steg korleis du registrerer kortet ditt, opprettar datastraumar og bygger eit kontrollpanel – med eksempelkode og bilete som støtte.

Kontrollpanel

I det interaktive biletet under kan du gå inn i dei ulike modulane på kontrollpanelet og lese meir om dei.

Oppsett av nettsida

Gjennom dei neste stega skal du setje opp alt det som er nødvendig for at Deploii skal fungere. Denne delen av brukarrettleiinga er støtta av bilete og kodesnuttar som tek deg gjennom dei ulike stega.

Mine kort

Det første Deploii må vite for at nettsida skal kunne kommunisere med kortet ditt, er kva kort du vil kommunisere med, og korleis.

Naviger til sida "Mine Kort" som vist i biletet under, og vel "Nytt kort".
Gå gjennom dei ulike stega og legg inn all nødvendig informasjon.

I løpet av prosessen kan du møte på innstillingar som er skjulte under ein "Avansert"-knapp, desse kan du trygt velje å ignorere inntil vidare.

Skjermbilete frå fanen Mine kort i programvara Deploii med teksten Oi, du har ingen kort enda og ein knapp for å legge til nytt kort. Skjermutklipp. — Viss du ikkje har registrert noko mikrokontrollarkort i systemet, vil du sjå dette skjermbiletet. Vel "Nytt kort" for å registrere mikrokontrollarane dine.

På biletet under ser du korleis det kan sjå ut etter at du har sett opp eit kort. I dette tilfellet viser nettsida at vi har sett opp ein Arduino UNO R4 Wi-Fi. Viss du har eit anna kort, må du velje det i staden.

Det er eit par ting det er verd å legge merke til i dette biletet.

Først står tilkoplingsstatusen til kortet. For deg vil det truleg stå "Frakoblet", som i dømet vårt. Du må laste opp ein kode til kortet før kortet kan koplast til. Denne koden finn du ved å trykke på "Kople til"-knappen på sida.
Viss du har sett opp fleire kort, kan du velje desse i nedtrekksmenyen i øvre venstre hjørne (der det står "Arduino Wi-Fi" i biletet). Du kan òg sjå kva datastraumar og kontrollpanel som bruker kortet ditt, på kort-sida, når dette er ferdig programmert.

Skjermbilete av fanen Mine kort i programvara Deploii. I ein nedtrekkmeny er Arduino Wi-Fi vald, og informasjon om dette kortet er vist på sida. For status er det det eit raudt felt merkt Frakoblet, og det er ein knapp med teksten Kople til. Skjermutklipp. — Her ser du korleis nettsida kan sjå ut når du har valt kort. Ser du kva kort som er valt her? Klarer du òg å sjå om kortet er aktivt eller ikkje?

Datainnsamling: datastraum

Etter at du har sett opp eit kort, må du fortelje Deploii kva slags data du ønsker å sende. Dette gjer du ved å opprette ein datastraum. Vel "Opprett ny datastrøm"-knappen under fanen for Datainnsamling.

Skjermbilete frå fanen Datainnsamling i programvara Deploii som beskriv korleis datastraumar kan opprettast, anten som ein datastraum å sende dataa med eller som ein måleserie for å lagre dataa. Under dei to vala er det ein knapp for å opprette ny datastraum. Skjermutklipp. — Slik vil datainnsamlingssida sjå ut viss du ikkje har oppretta nokon datastraum. Kva trur du knappen "Opprett ny datastraum" kan brukast til?

Her er det berre obligatorisk å fylle inn eitt felt, nemleg namnet på datastraumen. Når du fyller inn namnet, vil det automatisk bli laga ein datastraum-ID, og denne må du legge i koden din.

ID-en finn du ved å velje "Avansert"-knappen, vist i biletet under. Datastraum-ID-en blir generert automatisk ved å konvertere alle store bokstavar til små, alle mellomrom til understrekar og til slutt kvitte seg med spesialsymbol (og bokstavane æ, ø og å, sidan desse ikkje blir støtta i Arduino IDE når vi skal kode seinare).

Skjermbilete frå programvara Deploii for oppretting av ein datastraum med namn og ID. Namn er Temperatur 1 med stor T og mellomrom mellom ord og tal, mens ID er same tekst med liten forbokstav og liggande strek mellom ordet og talet. Det er ein nedtrekkmeny for val av ikon og knappane Avbryt og Fullfør. Skjermutklipp. — Her kan du gi datastraumen din eit namn, så genererer programvara ein eigen ID for datastraumen.

Til slutt kan du velje ein kategori for datastraumen, gjerne basert på kva type data du planlegg å sende, til dømes temperatur-data eller trykk-data. Dette vil gi datastraumen eit ikon som blir brukt på nettsida, slik at det er lettare å kjenne igjen det som blir målt.

Skjermbilete frå programvara Deploii som viser ein nedtrekkmeny med ulike ikon som kan veljast for ulike kategoriar, som vassdrope for fukt, termometer for temperatur og to pilar mot kvarandre med ein strek imellom for trykk. Skjermutklipp. — Programvara har nokre ferdige ikon som kan brukast, slik at du enklare kan kjenne igjen måleverdiar og datastraumar.

Etter du har sett opp eit par datastraumar, kan nettsida sjå ut som i det interaktive biletet under. Vel du tannhjul-knappen i øvre høgre hjørne av ein datastraum, vil du finne eksempelkode for å sende data frå kortet til han. Legg merke til at det ikkje er nokre tal i namna på datastraumane her, slikt det var i bileta over.

Gi datastraumane eigne namn

Du står fritt til å kalle datastraumane det du vil, som bileta over viser. Generelt er det tilrådd å legge til tal i namna på datastraumane viss du har datastraumar som har liknande namn / måler det same, til dømes tre ulike temperatursensorar på same kort, viss du vil samanlikne data frå sensorane.

Datainnsamling: måleserie

No som datastraumane er sette opp, kan dei brukast på to ulike måtar: anten i ein måleserie eller på kontrollpanelet. Er du mest interessert i å lagre dataa for nedlasting, er dette delen for deg, mens viss du er mest interessert i å observere data i sanntid, kan du hoppe rett til delen om kontrollpanel.

Måleseriar kan bestå av ein eller fleire datastraumar, alt avhengig av kva du ønsker å lagre, og når. Viss du set opp ein måleserie med til dømes tre separate datastraumar, vil Deploii lagre all innkommande data frå desse tre datastraumane.

Det er likevel viktig å presisere at sidan Deploii ikkje kan kontrollere når dei ulike datastraumane blir mottekne (det gjer kortet ditt), kan ikkje ein måleserie lagre dei tre datastraumane synkront. Dette fører til at kvar datastraum vi bli lagra separat med eit eige tidsstempel, slik at når du lastar ned måleserien, får du tre ulike filer, ei for kvar datastraum.

Viss du vil at alle dataa skal hamne i same fil, med same tidsstempel, må du setje opp måleserien med berre éin datastraum og sende ein array (liste) med data til denne måleserien. Dette gjer at Deploii alltid vil få alle dataa samtidig, sidan arrayen blir rekna som éin datastraum som inneheld fleire datapunkt.

Slik ser sida ut når ho er tom for måleseriar.

Skjermbilete frå fanen Datainnsamling i programvara Deploii som viser at det ikkje er registrert nokre måleseriar. Skjermutklipp. — Slik ser skjermbiletet ut viss du ikkje har lagra nokre måleseriar. Vel "Ny måleserie" for å opprette ein måleserie.

Opprette måleserie: tidsstyrt

Etter du har valt "Ny måleserie", vil du først bli beden om eit namn på måleserien og å velje kva datastraumar han skal hente data frå. I motsetning til for datastraumar har ikkje namnet på måleseriar noko å seie for kva som du må skrive i koden, så du kan gi han eit meir beskrivande namn, til dømes med veketal eller månad, utan at dette må inn i koden.

Skjermbilete frå programvara Deploii som viser registrering av ein måleserie. Det er eit felt for å skrive inn namn og eit felt der ein kan velje blant datastraumane Temperatur, Fukt og Trykk. Skjermutklipp. — Når du skal opprette ein måleserie, må du skrive kva måleserien skal heite, og velje kva datastraumar det skal lagrast data frå.

Deretter må du avgjere om varigheita av måleserien skal vere bestemd ut frå tidsrom eller eit bestemt antal målepunkt. Vel du tidsrom, blir du beden om ein start og ein slutt, du må setje både dato og klokkeslett. Dette fortel Deploii at alle dataa innanfor start og slutt skal lagrast.

Ver forsiktig, dette kan bli ei stor datamengde ...

Skjermbilete av eit utfyllingsskjema for varigheit i programvara Deploii. Det er valt tidsrom i staden for punkt og deretter start- og sluttidspunkt frå kalender- og klokkefunksjonar. Skjermutklipp. — Her er det valt å samle data i ein måleserie definert av eit tidsrom. Her blir alle dataa i eit døgn samla, frå 06.07.2025 kl. 18:59 til 07.07.2025 kl. 18:59.

Viss du ønsker å ta ein måleserie over eit lengre tidsspenn, kan det i nokre tilfelle vere ønskeleg å ikkje lagre data kvar dag. Derfor kan du setje opp ein rutine / eit filter som droppar visse vekedagar.

Skjermbilete av eit utfyllingsskjema for varigheit i programvara Deploii som viser valet Rutine med moglegheit for å velje start- og sluttintervall og enkelte vekedagar. Skjermutklipp. — I Deploii kan du òg velje å samle data over spesifikke tidspunkt, til dømes kvar måndag og onsdag.

Opprette måleserie: datapunktstyrt

Viss det ikkje er viktig for deg akkurat når data blir lagra, men heller kor mykje data som blir lagra, kan du i staden velje eit maksimalt antal punkt. Då vil Deploii lagre måledata opptil talet du skriv inn her. Det er ei avgrensing på 5 000 punkt for kvar enkelt måleserie (både ved tidsrom og punkt).

Skjermbilete av eit utfyllingsskjema for varigheit i programvara Deploii. Det er valt punkt i staden for tidsrom, og i eit felt for kor mange punkt som skal målast, er det angitt 1000. Skjermutklipp. — Du kan velje antalet målepunkt som skal lagrast, som eit alternativ til tidsramme. Kor lang periode dette blir samla inn over, kjem an på kor ofte du har programmert mikrokontrollaren til å sende data.

Aktivering av måleserie

Trykkar du "Fullfør", er måleserien sett opp. Når han begynner å få data, vil statusen gå til aktiv som i biletet under, og dei nylegaste dataa blir samanfatta. "Se mer"-knappen viser meir info.

Skjermbilete frå programvara Deploii som viser at det er oppretta ein måleserie som heiter Miljøstasjon, Adrian, uke 27. Status er vist med teksten Aktiv i ein grøn knapp. Nedst er det ein knapp merkt Se mer. Skjermutklipp. — Når du har registrert ein måleserie, vil han bli vist på kontrollpanelet i Deploii. Det blir òg vist om måleserien er aktiv (hentar data) eller er inaktiv.

Her kan du sjå grafen/dataa i større detalj og zoome inn og ut (førstnemnde er svært nyttig ved lagring av mange datapunkt). Viss du bruker musa og flyttar ho over ein av linjegrafane, vil du kunne sjå enkeltpunkt og tida dette punktet vart målt.

Trykkar du på eit av namna under grafen, til dømes "Temperatur", kan du skjule denne eine grafen.

Skjermbilete frå programvara Deploii som viser tre grafar, for temperatur, fukt og trykk. Til høgre for grafane er det annan informasjon, som status, målepunkt, tidsrom, ein nedtrekkmeny for å laste ned målingar og ein raud knapp merkt Slett. Skjermutklipp. — Her ser du visning av ein måleserie. Du ser om måleserien er aktiv, kor mange punkt som er samla inn, og du kan laste ned måleserien.

Nedlasting av data

Når du ønsker å laste ned dataa, vel du "Last ned målinger". Her får du alternativ for filtrering av data, og du kan bestemme filtypen. Kvar fil vil heite det same som datastraumen og vere stempla med nedlastingstid.

OBS!

Merk at data berre blir oppbevarte i 90 dagar frå lagringstidspunktet.

Skjermbilete frå programvara Deploii som viser tre grafar, for temperatur, fukt og trykk. Til høgre er menyen for å laste ned målingar utvida, og ein kan velje kva for ei av dei tre målingane som skal lastast ned, om det skal vere punkt, tidsrom eller intervall, og kva filtype ein vil ha. Det er ein eigen knapp som heiter Last ned. Skjermutklipp. — Når måleserien er ferdig, kan du laste ned. Du kan velje kva datastraumar som skal vere med, og du kan velje kva format dataa skal lastast ned i.

Kontrollpanel

No som du har sett opp den tekniske strukturen, er det på tide å bygge eit kontrollpanel der du kan visualisere data på ulike måtar.

Gå til fanen "Kontrollpanel", og du vil finne sida som vist i bileta under. Sida består sannsynlegvis av seks tomme boksar, sidan du ikkje har sett opp noko enno.

Du kan no legge til eit nytt kontrollpanel og gi det det namnet du ønsker.

Skjermbilete frå programvara Deploii som viser ein knapp for å opprette eit kontrollpanel. Skjermutklipp. — Du kan sjølv velje korleis kontrollpanelet i Deploii skal vere utforma. Når du vel "Nytt kontrollpanel", blir det opna ei ny nettside med seks tomme modulplassar.

Skjermbilete frå programvara Deploii som viser seks tomme felt. I ein nedtrekkmeny er det valt Adrians miljøstasjon, i eit gult felt ved sida av står det 0 kort tilkoblet. Ved sida av dei tomme felta er det ein knapp med pluss-symbol. Skjermutklipp. — På denne nettsida kan du legge til ulike modular for å vise datastraumane. Dette gjer du ved å velje pluss-knappen.

For å vise måledataa dine må du setje opp ein eller fleire modular i kontrollpanelet.

Først lagar du ein graf ved å velje pluss-knappen nedst til høgre. Gi modulen eit namn, og vel "Fortsett". Vel så kva datastraumar grafen skal vise (maks tre). Desse kan vere frå ulike kort, viss du ønsker det.

Skjermbilete frå programvara Deploii som viser eit skrivefelt for Modulnavn, der det er skrive Miljøstasjon graf. Skjermutklipp. — Du må gi dei elementa du skal legge på kontrollpanelet, eit namn. Her er det valt eit element i form av ein graf, som får namnet "Miljøstasjon graf".

Skjermbilete frå programvara Deploii som viser ei liste med element som kan visast i ein graf. Tre av desse er haka av i boksar ved namnet på datastraumane. Skjermutklipp. — Når du opprettar eit element, kan du velje kva datastraumar som skal visast. Her er det valt å vise Temperatur, Fukt og Trykk i grafen, altså tre grafar i same bilete.

Det siste du må bestemme, er kvar på kontrollpanelet modulen skal plasserast. I dette tilfellet blir plass 2, som er i midten øvst, valt. Som du kan sjå frå biletet, kan det berre vere seks modular per kontrollpanel. Men du kan lage fleire kontrollpanel.

Skjermbilete frå programvara Deploii som viser seks firkantar nummererte frå ein til seks. Plass 2, midt på øvste linje, er markert. Skjermutklipp. — Alle modular du legg til, må få ein definert plass på kontrollpanelet. Her kan du velje plassering.

Du kan no legge til fleire modular på kontrollpanelet, berre prøv deg litt fram med dei ulike modultypane.

Når du har bestemt deg for kva datastraumar du vil presentere i kontrollpanelet, korleis dei skal presenterast, og kvar dei skal plasserast, kan kontrollpanelet bli sjåande ut som i dette dømet:

Skjermbilete av kontrollpanel i programvara Deploii. Øvst til venstre Miljøstasjon styring med tastaturnavigasjon, øvst i midten Miljøstasjon graf med tre grafar, øvst til høgre Miljøstasjon logg med ei liste målingar, nedst til venstre Temperatur med gradestokkikon og temperaturmåling 19 gradar, nedst i midten Fukt med vassdropeikon og fuktmåling 40 % RH, nedst til høgre Trykk med trykkikon og trykkmåling 98 kPA. Skjermutklipp. — Her ser du korleis eit kontrollpanel kan sjå ut, med grafar, talvisning, listevisning og knappar for å styre mikrokontrollaren.

Tastaturstyring av mikrokontrollar

Ved å bruke tastaturmodulen kan du bruke Deploii til å styre kortet ditt frå kontrollpanelet. Dette fungerer ved at kvar modul som kan sende data til kortet, får ein modul-ID (du kan sjå på dette som ein datastraum i motsett retning, sjølv om datastraumar er meir tiltenkt måledata enn instruksar).

Kvar gong du til dømes trykker på ein knapp på kontrollpanelet, blir denne ID-en send saman med ein instruks til kortet ditt. Slik kan du samtidig setje opp fleire modular som tilbyr ulik funksjonalitet. Tastaturmodulen er ein av modulane som (berre) kan brukast til styring, og han er viste øvst til venstre i biletet over.

Opprette tastaturmodul

Når du set opp denne modulen, som i biletet under, gir du han først eit namn. Basert på dette namnet blir det laga ein modul-ID. Dette skjer på akkurat same måte som når det blir laga ein datastraum-ID (alt blir til små bokstavar, mellomrom blir erstatta av understrekar, og spesielle symbol og æ, ø og å blir erstatta/fjerna).

Du må òg velje kva kort instruksane skal sendast til. I biletet under er det valt same Arduino som i tidlegare delar av denne rettleiinga.

Skjermbilete frå programvara Deploii som viser oppretting av eit kontrolltastatur. Det er ein tekstboks for å skrive modulnamn i, der står det Miljøstasjon styring, og ein nedtrekkmeny for å velje kort du vil sende kommandoar til. Under er det ein boks med modul-ID der modulnamnet er gjenteke, men skrive med små bokstavar og med liggande strek i staden for mellomrom. Der er det valt Arduino Wi-Fi. Skjermutklipp. — Du kan opprette styringsknappar for å styre ein mikrokontrollar, til dømes til å slå eit lys av eller på. Du må gi tastaturmodulen eit namn og velje kva mikrokontrollar du skal sende dataa til.

Etter du har sett opp ein modul for styring, må du legge inn kode på kortet ditt for å få, lese av og reagere på desse instruksane. Som ved datastraumar tilbyr Deploii eksempelkode integrert rett inn i nettsida. Berre vel "Mer"-knappen i modulen, så vil du finne eit alternativ for å sjå eksempelkoden for modulen din.

Bruker du ulike modular, vil du sjå at kva slags instruksar du kan sende, varierer. Nokre modular vil ha førehandsinnstilte instruksar, som "w_down" og "w_up", mens ved andre modular kan du lage dine eigne instruksar. Det finst modular som kan både ta inn datastraumar og sende ut instruksar samtidig.

Modultypar

I denne brukarrettleiinga har vi ikkje gått gjennom alle dei ulike modultypane, men lagt opp til at du skal kunne prøve deg fram litt på eiga hand. Det er med vilje, for dette skal vere ein overordna introduksjon.

Kodegenerator (eksempelkode)

Deploii er sikkert noko heilt nytt for mange, og det kan vere mykje å lære på ein gong. I tillegg er det ikkje slik at alle som har bruk for Deploii, nødvendigvis treng å lære mykje om koding. Av og til held det å redigere litt kode for å få nødvendig forståing.

Derfor kjem Deploii med ein innebygd kodegenerator som lagar eksempelkode for deg, basert på det du fortel nettsida undervegs i oppsettet. Koden du får, er fullstendig frå Deploiis side, det betyr at du ikkje treng meir enn dette for at Deploii skal ta imot/sende data.

Deploii kan (foreløpig) ikkje gi deg kode for dei spesifikke sensorane dine eller anna elektronisk utstyr, som ein servomotor.

Kodegeneratoren finn du på alle hovudsider, altså "Mine kort", "Datainnsamling" og "Kontrollpanel".

Eksempelkodar

Kvar side vil gi deg litt ulik eksempelkode. Under "Mine kort" vil du foreløpig finne kode for å kople kortet til Deploii. Denne er berre meint for å teste at du har gjort alt rett i installasjon og oppsett. Viss du har gjort det, vil kortet stå som "Tilkoblet" på same side etter du har lasta opp koden.

Under "Datainnsamling", på sida med datastraumar, vil du finne eksempelkode for å sende data til ein datastraum. Denne koden er meint som eit generelt døme på sending av data. Kvar modul på kontrollpanelet kan bruke desse dataa.

Likevel er det nok best å hente eksempelkoden direkte frå kontrollpanelsida viss du vil bruke kortet her. Då får du kode spesifikk for kvar modul. Viss du til dømes har lagt inn tre datastraumar i ein graf-modul, vil du få kode som bruker alle tre datastraumane, og ikkje berre ein. Kontrollpanelsida vil òg gi deg eksempelkode for korleis du sender data til kortet frå Deploii, slik kan du styre til dømes eit lys.

Skjermbilete frå programvara Deploii som viser ein programmeringskode som er henta ved å velje tannhjul-knappen på modulen Miljøstasjon logg. Skjermutklipp. — Deploii kan gi deg ferdige kodar for kommunikasjon med mikrokontrollarar. Du kan bruke desse kodane som eit utgangspunkt for programmering av mikrokontrollaren din.

Over kan du sjå eksempelkode generert for Terminal-/Logg-modulen. Denne kan både ta imot data frå kortet og sende data til kortet, noko som er vist i eksempelkoden. Du finn kodegeneratoren på kontrollpanelsida ved å velje tannhjul-knappen i øvre høgre hjørne på alle modular.