14. Melding av ulykker og rapportering av skadar

Meldeplikt ved ulykker og nestenulykker

Etter lova er det meldeplikt for alle ulykker, hendingar og nestenulykker som skjer på arbeidsplassen. Direktoratet for samfunnssikkerheit og beredskap (DSB) og Petroleumstilsynet krev at alle slike hendingar skal rapporterast inn.

Formålet med meldeplikta er å finne årsaka til ulykkene og hendingane for å kunne forhindre at liknande hendingar skjer igjen.

Ved å analysere rapporterte hendingar kan farar identifiserast og nødvendige tiltak setjast i verk for å forbetre sikkerheita på arbeidsplassen.

Rapportering til relevante styresmakter

Når ei ulykke skjer som har med elektrisitet å gjere, anten det gjeld skadar på person, anlegg eller eigedom, skal det rapporterast til DSB. Skjer ulykka på land og ikkje har med elektrisitet å gjere, skal det meldast til Arbeidstilsynet.

Offshore- og petroleumsulykker

For offshoreanlegg, som oljeplattformer og andre petroleumsrelaterte anlegg, er det spesifikke krav om at alle fare- og ulykkessituasjonar skal meldast til Petroleumstilsynet. Det gjeld òg nestenulykker og hendingar som ikkje nødvendigvis fører til skade, men som kunne ha fått alvorlege konsekvensar.

Rapportering ved personskadar

Dersom ein arbeidstakar blir skadd, må det rapporterast til NAV. Det er viktig for å registrere yrkesskadar som kan gi seinskadar, men som ikkje nødvendigvis har symptom her og no. Rapporteringa må skje så tidleg som mogleg slik at nødvendig oppfølging kan setjast i verk for arbeidstakaren.

Rapportering ved alvorlege skadar eller dødsulykker

Alle alvorlege personskadar, også ulykker som resulterer i dødsfall, skal meldast til Arbeidstilsynet, politiet og forsikringsselskapet med det same. For offshorearbeid skal ulykka òg meldast til Petroleumstilsynet. Det er for å sikre at hendinga blir undersøkt grundig og at det blir sett i verk nødvendige tiltak for å hindre framtidige ulykker.

Test deg sjølv:

Svar på nokre spørsmål og sjå kva du hugsar av innhaldet i artikkelen.