Stykkingsdelar av lam

Oppdelingsplansje lam

Plansjen under gir oversikt over dei ulike stykkingsdelane på lammeslaktet. Dei ulike delane gir råstoff til ulike rettar og kjøttprodukt. Lam er eit ungt dyr, og det meste av kjøttet er relativt mørt. Det aller møraste er lammelåret og lammeryggen (indre- og ytrefilet). Lammeside, bryst, bog, knoke og nakke er ikkje like møre, og det blir tilrådd å bruke dei i gryte- og omnsrettar.

Film om grovoppdeling av lam

I filmen under (lengde 5:36) viser ein kjøttskjerar prosessen med å skjere ned eit lam. På skrottlappen står mellom anna informasjon om alderen, feittinnhaldet og klassen til lammet. Stykkingsdelane etter grovparteringa er nakke, bog, svange, lår og pinnekjøttsider. Til slutt kan du lære meir om kva kjøttprodukt dei ulike delane kan brukast til.

Stykkingsdelar av sau/lam

Får er samleomgrepet på sau og lam. Lammekjøtt har fine fibrar som gjer at det blir mørt og saftig. Sauekjøtt har litt grovare muskelfibrar og litt kraftigare smak, men det kan brukast til dei same rettane. Lam blir slakta etter at dei har vore på sommarbeite, og det er derfor sesong for lam frå august til november. Lammekjøtt er tillate å ete i alle religionar.

Bruk illustrasjonen og teksten under for å sjå kva dei ulike stykkingsdelane av lam kan brukast til.

Lammehovud (1)

blir brukt lettsalta (og røykt) til smalahove.

Bryst med nakke (2)

blir brukt kokt fersk eller lettsalta, til frikassé, fårikål, ragu og som innlegg i rull. Salta og tørka (og røykt) til pinnekjøtt.

Bog (3)

i skiver kan serverast fersk eller lettsalta. Han blir brukt til kokte rettar som fårikål, frikassé og andre gryterettar. Beinfri bog kan surrast og brukast som steik. Av bog kan vi òg produsere kjøttdeig som blir brukt til moussaka og greske kjøttbollar.

Kotelettkam og lammesal (4)

Lammesal går frå låret og fram til ribbeina, kammen går frå ryggen og fram til nakken. Både kam og sal består av både indrefilet og ytrefilet. Kotelettkam kan vi bruke til kotelettar eller karré. Vi kan få kotelettane som enkle eller doble, og dei eignar seg godt til både grilling og steiking. Lammefilet (indre og ytre) kan skjerast ut og heilsteikast eller bli steikt i medaljongar. Dei kan òg brukast til filet sauté eller grillspyd.

Side (5)

kan brukast til fårikål, grillkjøtt og gryterettar. Ho kan bli salta og tørka til pinnekjøtt, og slagsida kan brukast til lammerull.

Lår (6)

blir brukt som lammesteik med og utan bein og til fenadlår, i skiver til steiking og grilling. Vi kan òg beine ut låret slik at vi får mørbrad, flatbiff, beinfri lammesteik og skav til gryterettar. Lammeskank er den nedste delen av lammelåret og kan bli bresert, kokt eller grilla.