Sanseløype

Læraren har på førehand blanda ut nokre løysningar av sukrose (søt), natriumklorid (salt), sitronsyre (sur) og koffein (bittert) i vatn i ulike konsentrasjonar. Den same smaken kan gjerne blandast i fleire beger med ulik styrke. Merk drikkebegera med tal, og del ut til elevane. Kvar elev må òg ha reint vatn til skyljing av munnen etter kvar prøve. Elevane får så eit skjema der dei kryssar for kva smak dei kjenner igjen.

Gå gjennom fasiten, så kan elevane sjå kor mange dei klarte å kjenne igjen. Er det ein supersmakar i klassen?

Læraren legg små bitar av ulike matvarer i ein behaldar som blir dekt med aluminiumsfolie. Stikk hol i folien, slik at elevane kan lukte, men ikkje sjå matvara. Merk behaldarane med tal, og la kvar enkelt elev få lukte og skrive ned det dei assosierer med lukta. Kor lett er det å kjenne igjen ei matvare på lukta utan å kunne sjå ho?

Læraren deler opp små bitar av eple, og deler ut to bitar til kvar elev. La kvar elev halde seg for nasen mens dei smaker på den første eplebiten. La så elevane fjerne handa frå nasen og smake på den andre biten. Var det nokon forskjell på korleis eplet smakte?

I denne oppgåva skal elevane undersøke om same type mat smaker likt i to ulike rom med ulik lyd og lys. Læraren må på førehand ha gjort klar to rom. Det eine rommet har dempa belysning og roleg musikk. Det andre rommet har sterk belysning og rask, oppløftande musikk. Smaker den same maten likt eller ulikt i dei to romma?