Utforsk forteljingar på fleire språk
Del 1: Ord i forteljinga
Kva betyr desse orda frå forteljinga "Den gigantiske nepen"? Slå opp i ordboka "Lexin" eller "Ordbøkene" viss du er usikker. Oversett til førstespråket ditt. Du kan òg spørje prateroboten til NDLA om hjelp, men hugs å vere kritisk til forslaga frå roboten.
landsby
spade
nepefrø
spire
knyttneve
raudbete
bom fast
luskande
pilande
musehol
Del 2: Les forteljinga "Den gigantiske nepen"
Les forteljinga "Den gigantiske nepen" på norsk felles i klassen. Lytt til teksten og sjå på illustrasjonane til.
Del 3: Les forteljinga på eige førstespråk
Les forteljinga "Den gigantiske nepen" på ditt eige førstespråk. Viss forteljinga ikkje er tilgjengeleg på førstespråket ditt, kan du lese ho på engelsk eller eit anna språk du kjenner til.
Del 4: Snakk saman om verkemiddel
Jobb saman to og to. Svar munnleg på oppgåvene under.
Korleis blir gjentaking som verkemiddel brukt i forteljinga? Vis til døme.
I forteljinga er humor eit tydeleg verkemiddel. Korleis påverkar humor som verkemiddel lesaren? Vis til døme både i tekst og illustrasjonar.
Korleis får dyr menneskelege eigenskapar i forteljinga? Kvifor har forfattaren valt dette verkemiddelet? Grunngi svaret ditt og vis til døme.
Del 5: Lag ei framføring på fleire språk
Lag ei framføring av forteljinga "Den gigantiske nepen" der alle språka de har i klassen blir brukte i same framføring. Det kan til dømes vere ukrainsk på første biletet, vietnamesisk på andre biletet og så vidare.
De kan framføre ved å snakke under sjølve framføringa, eller ved at de speler inn lyd til kvar enkelt illustrasjon. Bruk illustrasjonane som er laga til forteljinga.
Presenter framføringa for ei passande gruppe, ein klasse eller liknande.
Del 6: Skriv ei eiga forteljing
Lag ei eiga forteljing. Vel mellom dei to alternativa under:
Lag ei eiga forteljing med eit innhald som er inspirert av ei forteljing du kjenner frå heimlandet ditt.
Lag ei eiga forteljing med eit innhald som er inspirert av forteljinga "Den gigantiske nepen".
Bruk verkemiddel som til dømes gjentaking, dyr som får menneskelege eigenskapar, humor eller kontrast i forteljinga di.
Du kan lage illustrasjonar til forteljinga di ved å teikne sjølv eller bruke biletroboten til NDLA.
Du kan spele inn lyd på forteljinga di slik det er gjort til forteljinga "Den gigantiske nepen". Ha éin lydversjon på norsk og éin på førstespråket ditt.
Del 7: Del forteljingane med kvarandre
Gå saman i ei lita gruppe. Vis forteljingane de har laga i del 5 for kvarandre. Fortel kva du har tenkt når du valde kva forteljinga di skulle handle om.