Fag

Oppgåve

Video

Analyser ein reklamefilm

Sjå reklamefilmen frå saft- og syltetøyprodusenten Lerum (lengde 0:45), og prøv å oppdage korleis han prøver å påverke deg til å kjøpe produkta deira.

Reklamefilm for Lerum. Video: Lerum / Avgrensa gjenbruk

Ordforklaringar til filmen

Eplekjekk: Idiom: Du er eplekjekk når du skryter og speler tøff.
Teke på fersken: Idiom: Når du blir oppdaga akkurat idet du gjer noko gale, blir du teken på fersken.
Innhausting: Innhausting er når du plukkar inn bær og frukt om hausten.
Det blir som å samanlikne eple og pærer: Eit uttrykk som blir brukt for å vise at noko som er veldig ulikt ikkje kan samanliknast.
Snakke mandarin: Mandarin kan vere både ei frukt og eit språk som blir snakka i Kina.
Eg skal mose deg: Idiom: Du mosar nokon når du vinn klart over dei.
Ligge i gena: Uttrykk som betyr at du er fødd med noko, har ein medfødd eigenskap som du har arva frå nokon i slekta di.
Bær på hjernen: Uttrykket "å ha noko på hjernen" betyr at du er veldig oppteken av noko og nesten berre tenker på det. Her er personen veldig oppteken av bær.

Oppgåve

Til læraren

Denne oppgåva er tenkt for munnleg diskusjon. Ein fin måte å sikre munnleg aktivitet hos alle på er å ta for seg oppgåva del for del:

La elevane snakke saman i par om del 1.
Samanfatt svara/diskusjonen i del 1 i grupper eller i heile klassen.
Gjenta for dei andre delane.
Del 6 er fin som felles oppsummering. Denne delen kan òg ende opp i ein kort skriftleg tekst.

Del 1: Kven, kva og kvifor?

Kven er avsendar av filmen?
Kva er formålet med filmen?
Kva er produktet eller produkta som skal seljast?
Kven er målgruppa for filmen?
Finn informasjon om avsendaren (lerum.no) på Internett. Kva produserer bedrifta? Kvar held ho til?

Del 2: Handlinga i filmen

Kva skjer i filmen? Beskriv kort dei ulike scenane.
Kva slags inntrykk får vi av staden, menneska og av livet i "saftbygda"?
Kva blir ikkje vist, trur du?
Er det verkelegheit eller fiksjon vi får sjå her?

Del 3: Forteljaren i filmen

Kven er forteljaren i filmen? Si noko om kva slags person du trur det er.
Kvar kjem forteljaren frå? Klarer du å høyre kva slags dialekt ho bruker?
Kvifor er nettopp denne personen vald til forteljar, trur du?

Del 4: Produktets "personlegdom"

Kva eigenskapar og verdiar vil produsentane at du skal tenke på når du ser Lerum-merket?
Er dette verdiar du/de er opptekne av?

Del 5: Etos, logos og patos

Sjå animasjonen under om dei tre appellformene etos, logos og patos (lengde 06:55).

Video: Klipp og lim / CC BY-SA 4.0

Kva for nokon av dei tre appellformene bruker avsendaren mest i reklamefilmen?
1. det å bygge opp truverdet sitt (etos)
2. det å appellere til kjenslene (patos)
3. det å gi saksinformasjon (logos)?
Forklar korleis sendaren bruker desse verkemidla for å bygge opp truverd, vekke kjensler og/eller informere:
1. val av scenar og miljø i filmen
2. forteljarstemme
3. humor
4. musikk
5. andre verkemiddel?

Del 6: Vurder filmen

Synest du/de reklamefilmen er god? Gir filmen deg lyst til å prøve produkta deira? Grunngi svaret!