Handtering av konfliktar på jobb

Korleis kan vi oppleve ein konflikt?

At vi er ueinige med kollegaene våre og dei med oss, betyr ikkje at vi ikkje liker kvarandre, men vi kan likevel kjenne ei uro i magen, og kjenslene kan ta overhand. Innan helseserviceyrka er det ofte små arbeidsplassar, med små arbeidsmiljø og dermed få medarbeidarar å spele på. Dette kan føre til

• danning av alliansar

• utanforskap

• baksnakking

• ueinigheit som kan utløyse negative kjensler

Konfliktførebyggande kommunikasjon

Vi kan unngå konfliktar på ein arbeidsplass ved å bruke konfliktførebyggande kommunikasjon. Dette er kanskje den mest brukte reiskapen vi har, og det er ikkje alltid vi veit at vi bruker det, det kjem naturleg. Ved å danne gode relasjonar unngår vi ofte konfliktar.

Konfliktførebygging er vern av eit arbeidsmiljø. Viss du er ein del av eit arbeidsmiljø som har fokus på respekt og toleranse, der arbeidstakarane er vennleg stilte overfor kvarandre, blir det skapt trygge og gode rammer for eit robust arbeidsmiljø. For å kommunisere konfliktførebyggande må du ha

• menneskeinteresse

• sosial kompetanse

• relasjonskompetanse

• openheit og tillit til dei rundt deg

• eit heilskapleg menneskesyn

LØFT

Når det oppstår konfliktar, er vi gjerne raske til å skylde på kvarandre, og vi kan henge oss opp i det negative. Korleis kan vi, ved hjelp av ulike strategiar, skape gode løysingar og auke trivselen?

LØFT er ei løysingsfokusert tilnærming som legg vekt på å identifisere og bygge vidare på styrkar og ressursar i staden for å analysere problem. Denne tilnærminga gir oss høve til å rette merksemda mot det som fungerer, og kva vi kan oppnå saman.

LØFT handlar om å skape positive endringar og løysingar i relasjonar, med mål om å fremme vekst og arbeidsglede ved å styrke folks evne til å finne løysingar. Når vi har ei slik løysingsfokusert tilnærming, legg vi vekt på det som fungerer godt, i staden for å leite etter det som går gale. Det inneber å verdsetje og anerkjenne det folk gjer, i staden for å kritisere.

LØFT-prinsipp:

• Snakk om løysingar.

• Fokuser på det som fungerer godt.

• Åtferd som får merksemd, blir gjenteken. Derfor bør vi

  • konsentrere oss om det vi ønsker, ikkje det vi vil unngå

  • finne ut kva som verkar, i staden for kva som ikkje verkar

Kjernen i LØFT-metoden ligg i prinsippet om at åtferd som får merksemd, har ein tendens til å gjenta seg. Hovudfokuset er derfor å fokusere på kva det er vi ønsker. Kva er ønskt situasjon?

Når vi blir klar over kva som fungerer, og kva vi må gjere for å få det til, vil slike handlingar og kvalitetar auke.

Denne metoden eignar seg godt ved behovskonfliktar og personkonfliktar både mellom kollegaer og i møte med utfordrande kundar eller pasientar.

SØT-modellen

SØT-modellen er ein metode som ofte blir nytta når ein skal få ting gjort og gå frå ord til handling. Det er ofte ein berre snakkar og snakkar, men ingenting skjer. Mange har positive erfaringar med denne modellen. Han kan brukast både til konflikthandtering og til å gjere ei generell endring. SØT-modellen kan bidra til å løyse konfliktar strukturert og målretta.

SØT-modellen har tre enkle trinn:

S – Situasjonen no

Ø – Ønskesituasjonen: Kva er det eigentleg vi vil ha?

T – Tiltak: Kva må vi gjere for å oppnå ønskesituasjonen?

Tiltaka kan gjennom handling bygge bru over gapet mellom nosituasjonen og ønskt situasjon.