Gjer greie for barnesjukdommane

1. Utforsk ein vanleg barnesjukdom

Vel éin av barnesjukdommane frå lista under som du skal utforske nærmare. Du kan velje om du vil gjere oppgåve A, som er å lage eit informasjonshefte (individuell oppgåve), eller oppgåve B, som er å lage ein podkast (saman med ein eller fleire medelevar).

• Vasskoppar

• Raude hundar

• Kikhoste

• Kusma

• Meslingar

• Skarlagensfeber

• Den fjerde barnesjukdommen

• Den femte barnesjukdommen

A. Lag eit informasjonshefte

Lag eit informasjonshefte om sjukdommen de har valt. Heftet skal vere oversiktleg og retta mot foreldre.

Heftet skal innehalde

• ei kort beskriving av sjukdommen og kva mikroorganisme som forårsakar han

• vanlege eller typiske symptom, med bilete og beskriving av sjukdomsforløpet

• eventuelle komplikasjonar som kan oppstå

• informasjon om behandling og om det finst vaksine mot sjukdommen

• råd og tips til føresette under sjukdomsforløpet

• informasjon om når barnet kan dra tilbake til barnehage eller skule

B. Lag ein podkast

De skal jobbe i grupper på to til tre elevar og spele inn ein podkast om ein av barnesjukdommane. Det er også mogleg å spele inn samtalen som ei vanleg lydfil. De kan gjere opptak på PC eller mobil.

Dersom de treng ei innføring i å spele inn podkast, finn de ei enkel rettleiing her: "Korleis lage ein podkast".

Dette skal vere med i podkasten:

Introduksjon

Fortel kven de er, og kva sjukdom de skal snakke om.

Årsak, symptom og sjukdomsforløp

Fortel kva mikroorganisme (virus eller bakterie) som er årsak til sjukdommen, og gjer greie for symptom og sjukdomsforløp.

Behandling

Fortel kva ein kan gjere for å lindre ubehag som feber, smerte eller kløe.

Vaksinasjon

Fortel om det finst vaksine mot sjukdommen, og om vaksinen er ein del av det norske barnevaksinasjonsprogrammet.

Råd til føresette

Kom med praktiske tips til føresette om pleie og omsorg for barnet mens det er sjukt, og fortel når barnet blir rekna som smittefritt og kan vende tilbake til barnehage eller skule.

2. Lag ei oversikt over barnesjukdommane

Sidan fleire av dei mest kjende barnesjukdommane har symptom som liknar kvarandre, skal du lage ein tabell som gjer det lettare å sjå likskapar og forskjellar.

Etter at du har fylt ut tabellen, skal du skal svare på spørsmål om sjukdommane og lage eigne spørsmål til medelevane dine.

A. Fakta om kvar sjukdom

Last ned tabellen nedanfor og fyll ut fakta om kvar sjukdom: inkubasjonstid, symptom, smittemåte, immunitet, behandling og smittefare. Nedanfor forklarer vi desse omgrepa.

• Tabell over barnesjukdommane (til utfylling)(DOCX)

Inkubasjonstid

tida frå ein person blir smitta av ein mikroorganisme til dei første symptoma på sjukdommen viser seg

Symptom

teikn på sjukdommen (til dømes utslett eller feber) og korleis forløpet er

Smittemåte

korleis smittestoffet blir overført frå ein person til ein annan, til dømes gjennom lufta (drope- og luftsmitte) eller ved fysisk berøring (direkte og indirekte kontaktsmitte)

Immunitet

ein tilstand der ein ikkje lenger kan bli sjuk av ein bestemd mikroorganisme, anten fordi kroppen har utvikla eit forsvar gjennom tidlegare sjukdom eller på grunn av vaksinasjon

Behandling

medisinske tiltak som kan kurere sjukdommen (til dømes antibiotika), eller tiltak som lindrar ubehag og symptom

Smittefare

risikoen for når ein kan overføre smitte til andre, og dermed når eit barn kan vende tilbake til barnehage eller skule

B. Spørsmål og svar om sjukdommane

Etter at du har fylt ut tabellen med fakta om sjukdommane, skal du svare på spørsmåla under.

1. Kva barnesjukdommar har like symptom?

2. Kva for nokre av sjukdommane inngår i barnevaksinasjonsprogrammet?

3. Kva barnesjukdommar gir varig immunitet etter gjennomgått sjukdom eller vaksinasjon?

Etter at du har svart på spørsmåla, kan du lage fleire faktaspørsmål som du stiller til ein eller fleire medelevar.