Oppgåve

Jobb kreativt med berekraft og det gode liv

Vel presentasjonsform sjølv og fortel korleis det gode liv med eit berekraftig forbruk kan sjå ut i framtida.

Oppgåve

Lag ei historie eller ein presentasjon som seier noko om korleis vi kan ha eit berekraftig forbruk og samtidig leve gode liv i framtida.

Kva er problemet i dag? Kvifor lever vi ikkje berekraftig?
Korleis kan vi klare å endre samfunnet?
Korleis kan eit berekraftig og godt liv sjå ut i framtida?

Forma er valfri, men vi har lagt inn tre ulike forslag under.

Tips til bakgrunnsstoff

Tips til læraren

Oppgåveformuleringa er ganske vid og lite konkret. Det er fordi formålet med oppgåva er at elevane skal få jobbe kreativt utan for sterke føringar. Du som kjenner klassen din, må vurdere om dei treng ein meir konkret oppgåvetekst. I så fall kan nokre av desse formuleringane hjelpe:

Lag ein framtidsvisjon om korleis vi kan leve berekraftig i 2050.
Historia eller presentasjonen din må komme med minst to konkrete forslag til korleis verda skal bli meir berekraftig, altså korleis vi skal klare å leve annleis.
Bruk minst fem av følgande fagomgrep i historia/presentasjonen din: berekraft, berekraftig utvikling, forbruk, masseforbruk, overforbruk, sirkulær økonomi, økologisk fotavtrykk, klimagassutslepp, det grøne skiftet, grøn vekst, nedvekst, fast fashion.

Denne oppgåva kan gjerast så stor eller liten som ein ønsker. Det går an å gjere ho til del av ei innlevering, eller ein kan la elevane presentere for kvarandre framfor heile klassen eller i mindre grupper. Det kan òg berre vere ei heilt kort introduksjonsøving for å la elevane jobbe litt kreativt.

Temaet i oppgåva kan gjerne knytast til andre tema i faget, som levekår, ressurs- og arealbruk, globalisering og berekraftig utvikling.

Forslag til form

1. Lag slampoesi om forbruk og det gode liv

Lag slampoesi med bodskap om korleis eit godt liv med berekraftig forbruk kan vere. Kva er vi opptekne av då? Korleis lever vi? Kva kjøper vi?

Slampoesi (eller poesislam) er ei diktform inspirert av ulike sjangrar som teater, standup, hiphop og rapp. Dikta har ei fri form, men er ofte artige, leikne og rytmiske. Sjølve framføringa er ein viktig del av slampoesien.

Søk gjerne på slampoesi på nettet eller sjå Åsmunds Seips framføring av "Eg vil merkast av livet" på Vimeo dersom du treng å sjå nokre døme.

2. Krafta til sommarfugleffekten

Skriv ei forteljing om forbruket i framtida der ei lita hending har sett i gang store endringar i heile verda. Dette blir gjerne kalla sommarfugleffekten.

Sommarfugleffekten betyr at ei lita hending kan få store følger. Namnet kjem frå idéen om at eit lite vengeslag frå ein sommarfugl på den eine sida av jorda kan setje i gang små endringar i lufta, som til slutt kan bidra til å endrevêret på den andre sida av jorda. Poenget er at små ting av og til kan vekse og få mykje større konsekvensar enn vi kunne føresjå.

Viss du treng inspirasjon, kan du sjekke ut Knutsen og Ludvigsens song "Eventyret om ein melodi".

3. Biletforteljing om framtida

Lag ei biletforteljing av korleis ei verd med eit meir berekraftig forbruk kan sjå ut.

Tre forslag til korleis dette kan løysast:

Teikn bilete og set det saman med tekst. Det bør vere minst fire ulike bilete.
Teikn ei teikneseriestripe med teikningar og tekst. Det bør vere minst seks teikneserieruter.
Lag ei digital biletforteljing. Det bør vere minst åtte bilete sette saman med tekst og lyd som til saman utgjer ei god forteljing.