Gjer deg klar til geografieksamen
Rammer for munnleg eksamen
Munnleg eksamen er todelt og består av
førebuingstid: 24 timar
eksamenstid: inntil 30 minutt
Det betyr at du får 24 timar på å førebu deg på det du møter på eksamen. Du vil få eit tema eller ei ganske vid oppgåve.
Du kan velje å bruke litt av førebuingstida til å lage ein presentasjon for å svare på oppgåva, men det er ikkje eit krav. For mange kan det likevel vere lurt å starte eksamen med å halde ein presentasjon; du får ha regien, noko som kan gjere situasjonen litt tryggare. Presentasjonen kan vare i inntil 10 minutt.
Tenk over
Kva meiner du kan vere fordelar og ulemper med å velje presentasjon på munnleg eksamen?
Film: Munnleg eksamen
Filmen under (lengde 11:18) går gjennom korleis munnleg eksamen med førebuingsdel fungerer. Sjølv om filmen er laga til faget marknadsføring og leiing, får han godt fram både korleis eksamensforma er, og kva som skal til for å få ein god karakter.
Eksamen er lokalgitt
I læreplanen står det at eksamen i geografi blir utarbeidd og sensurert lokalt. Det betyr at det er faglæraren din som utarbeider eksamen, ofte i samråd med ekstern sensor. Geografilæraren din veit kva de har jobba med i timane, og lagar eksamen med utgangspunkt i dette. Derfor er det lurt å repetere og jobbe med det de har vore gjennom i faget i løpet av skuleåret.
På eksamen er det i utgangspunktet faglæraren din som er eksaminator og dermed den stiller dei fleste spørsmåla. I tillegg er ein ekstern sensor til stades. Dette er ein lærar som jobbar på ein annan skule. Sensor kan òg stille spørsmål og vil vere den som har det siste ordet når karakteren skal setjast.
Lær fagomgrep
Geografi handlar om å forstå verda rundt oss. Korleis har naturen og samfunnet forma denne staden? Dei fleste klarer å seie noko om dette, men om du skal gjere det bra på eksamen, er det lurt å kople det til fagomgrep. Å pugge, forstå og øve seg på å bruke fagomgrep munnleg vil vere ei god førebuing til eksamen.
Vi har to sider du kan bruke for å jobbe med fagomgrep:
Finn ut kva du kan
Når du skal førebu deg til eksamen, er det lurt å finne ut kva du kan, og kva du ikkje kan. Då blir det enklare å gjere noko med det du ikkje kan.
Geografifaget på NDLA er delt i åtte fagemne (i tillegg til eit emne om faget og eit verktøy- og metodeemne). I alle dei åtte fagemna finn du ei side som heiter "Kva kan du no?". Desse sidene kan du bruke aktivt til å finne ut kva du kan godt, og kva du treng å jobbe med.
Her finn du dei ulike sidene:
"Kva kan du no?" til emnene Globalisering og lokalisering og Klima kjem i løpet av våren 2026!