Saemien nasjonaale symbovlh
Daelie lïerh
saemien symbovli bïjre
Saemiej åålmege-biejjie
Saemiej laavlome
Saemiej vuelie
saemien saevege
Saemiej laavlomen laavlodh jïh ussjedalledh sisvegen bïjre
Lohkh jïh lïerh saemien naasjonale symbovli bïjre!
Saemiej åålmege-biejjie
Goevten 6. b. saemiej åålmege-biejjie. Noerhte-laanti saemie-konferanse Helsinkesne jaepien 1992 daam biejjiem saemiej nasjonaale-biejjine jååhkesji. Voestes aejkien nasjonaale-biejjiem heevehtimh jaepien 1993.
Goevten 6. b. lea byjjes saevege-biejjie Nöörjesne.
Mijjieh goevten 6. b. heevehtibie dan åvteste saemieh dellie voestes aejkien tjåanghkanin juktie vihkeles saemien aamhtesh digkiedidh jïh aktese-vyöki barkedh rïjhki rastah. Daate rïjhke-tjåanghkoe lij Tråantesne jaepien 1917.
Jaepien 2017 lij stoerre heevehtimmie Tråantesne, 100 jaepieh voestes rïjhke-tjåanghkoen mænngan.
Datne daajrah?
Saemiej laavlome
Isak Saba (1875–1921) Unjárgeste Saemiej laavlomem tjaaleme.
Noerhte-laanti saemie-konferanse Ååresne jaepien 1986 dam laavlomem saemien-åålmegen nasjonaale-laavloeminie jååhkesji.
Saemiej laavlome gaajhkide saemien gïelide jarkoestovveme.
Saemiej vuelie
Noerhte-laanti saemie-konferanse Váhtjerisnie jaepien 2022 «Sámi eatnan duoddariid» saemien nasjonaale-vueline jååhkesji.
Tjiehpiedæjja jïh joejkije Áillohaš (Nils-Aslak Valkepää, 1943–2001) daam vueliem dorjeme.
Saemien saevege
Noerhte-laanti saemie-konferanse Ååresne jaepien 1986 saemien-åålmegen saevegem jååhkesji. Tjiehpiedæjja Astrid Båhl, Skibotnistie, dam hammoedamme.
Saevegen klaerieh rööpses, plaave, kruana jïh viskes. Saevegen gaskoeh gievlie, biejjie jïh aske. Rööpses gievlie biejjie jïh plaave jis aske.
Saevegen symbovlh gievreste aaj båetieh jïh saemien sjugniedimmie-eposistie «Biejjien baernieh», maam saemien hearra Anders Fjellner (1795–1876) dovletjistie govleme jïh tjaaleme.
Ohtsedh Saemiej laavlomen gaskeviermesne, jïh laavloeh voestes jïh minngemes boelhketjem!
Nuelesne dan elmien jissien
vååjnesh saemiej eatneme lea.
Vaeriej duekesne guevtelh vaajjah,
våaroen tjïelke jaevrieh vååjnoeh.
Dalvesh, vaerieh, vaartoeh, vuemieh
alnadahkh elmeden vööste.
Johkh vijtjeldieh vuejtieh sjuvvieh.
Vaartoes-gaejsieh, njiemehtje-spaenjieh
tjåadtjoeh vööste mearoem.
Dovletje lea mijjen maadtoe
miedtiejidie baajhtestamme.
Mijjieh aaj, vïellh vuastalibie
vueliedæjjah tjimkes-laakan!
Biejjien baerniej veaksehks maadtoe!
Eah edtjh datnem fæjjoeh nåhkehtidh,
jis geehth jïjtjedh gullie-gïelem,
måjhtah maadtoen bïhkedassem:
Saemien eatneme saemide!
Gaaltije
Tjaelije: Isak Saba
Jarkoestæjja: Ella Holm Bull
Buerkesth Saemiej laavlomen minngemes jiehtegem!
«Saemien eatneme saemide!»
Dovletje lea mijjen maadtoe
miedtiejidie baajhtestamme.
Mijjieh aaj, vïellh vuastalibie
vueliedæjjah tjimkes-laakan!
Biejjien baerniej veaksehks maadtoe!
Eah edtjh datnem fæjjoeh nåhkehtidh,
jis geehth jïjtjedh gullie-gïelem,
måjhtah maadtoen bïhkedassem:
Saemien eatneme saemide!