Å gi form i produksjon og til produkt
I alle yrke der du skaper eit produkt, utfører eit handverk eller designar ei løysing for ein kunde, gir du form til noko. Frisøren gir form til håret, og blomsterdekoratøren skaper former med blomstrar og plantemateriale. Interiørkonsulenten må kunne noko om samspelet mellom former. Dersom du skal designe ein bruksgjenstand som eit klesplagg, eit møbel, ein vase eller eit smykke, må du kunne gi form til gjenstanden på ein god måte.
Grunnleggjande formelement
Uansett kva du gir form til i yrket ditt, må du kjenne til dei grunnleggjande formelementa. Du må kunne bruke og kombinere dei for å skape formuttrykk. Dei grunnleggjande elementa er
- punkt
- linje
- flate
- form
Punkt
Punktet er det enklaste formelementet. Set vi fleire punkt saman, vil det dukke opp usynlege lenkjer som gjer at vi kan sjå mønster.
Linje
Ei linje kan vi teikne, men vi kan òg sjå ei linje som vi føler oppstår mellom andre former. Til dømes vil fleire punkt kunne danne ei linje. Ein strek er alltid teikna, han er konkret med ei byrjing og ein slutt.
Flate
Når vi snakkar om flate, snakkar vi gjerne om overflata på noko. Ei flate er avgrensa. Flata er todimensjonal, men ho kan vere bøygd og følgje ei form.
Form
Gjenstandar er tredimensjonale. Ein gjenstand kan du sjå frå alle sider. Forma på ein gjenstand har eit rominnhald, og dette kallar vi volum. Forma kan vere massiv eller hol. Ein gjenstand kan òg vere sett saman av fleire former.
