Taktil og visuell tekstur
Tekstur handlar om korleis vi opplever overflater. Ei glatt overflate kjennest annleis ut enn ei mjuk overflate. Vi kan både kjenne og sjå at overflater har ulik karakter.
Teksturen kan vi oppleve taktilt eller visuelt. Taktil betyr at du faktisk kan kjenne overflata om du tek på ho, mens ei visuell oppleving av tekstur er at ein kan førestille seg kjensla av teksturen ved å sjå på han. Teksturar kan brukast til å understreke former, kontrastar, kjensler og djupn.
Tenk over eller diskuter
Overflater kan til dømes vere glatte, ru, mjuke og harde. Kor mange ord kan du kome på som beskriv ulike overflater?
Teksturkontrastar
Du kan skape kontrast mellom to eller fleire materiale i eit produkt. Til dømes kan det vere kontrast mellom tre og metall, som i stolen her. Metall er glatt, og vi opplever det som kaldt og hardt. Tre er også hardt, men vi opplever overflata som langt varmare enn metallet.
Døme på teksturkontrastar:
ru mot glatt
matt mot blank
mjuk mot hard
grov mot fin
Harde, mjuke og plastiske materiale
Ulike materiale har ulik overflate eller tekstur. Det kan vere ei glatt og kald metallisk overflate, ei varm og loden overflate i tekstil eller ei ru og røff overflate i betong.
Vi kombinerer og set saman ulike overflater i produkt vi lagar, i omgivnadene våre og i antrekka våre.
Nokre produkt uttrykkjer harmoni, til dømes i eit interiør med naturlege materiale som tre, betong, keramikk, skinn og tekstil som ull og lin. Andre produkt tilfører meir kontrast, som til dømes ein stol i plast eller ei lampe i farga glas.
Bruk av teksturar i produktutvikling
Ein del av idéutviklinga og produksjonen av nye produkt er bruk av teksturar. Det er viktig å ha eit medvite forhold til korleis du bruker teksturar for å skape ulike stemningar og uttrykk. Å ta i bruk og setje saman ulike taktile materiale er ein naturleg del av produktutviklinga.
Dersom du skal jobbe med eit grafisk produkt eller visualisere ein idé todimensjonalt, bruker du også ulike teksturar visuelt. Du skaper inntrykk av ulike overflater gjennom den visuelle opplevinga vår av teksturane.
