Om filmen
I 1984 starta ein stor og langvarig gruvearbeidarstreik i Storbritannia. Mange streikande gruvearbeidarar og familiane deira måtte leve berre på donasjonar, sidan regjeringa fraus midla til fagforeininga.
Ei gruppe homofile og lesbiske aktivistar i London finn ut at dei vil støtte dei streikande gruvearbeidarane. Dei dannar foreininga “Lesbians and gays support the miners”.
Foreininga startar å samle inn pengar til ein tilfeldig liten gruveby i Wales. Etter kvar blir dei godt kjent med gruvearbeidarane i byen og familiane deira. Det viser seg å vere utfordrande å skulle hjelpe ein liten gruveby på landet når ein er fargerik og homofil frå storbyen. Det er nemleg ikkje alle arbeidarane som er like glade for å få økonomisk støtte frå ein gjeng såkalla “pits and perverts”.
Storbritannia på 80-talet
Filmen gir eit innblikk i dei streikande livet til arbeidarane under Margaret Thatchers leiing på 80-talet. Han viser òg korleis det var å leve som homofil i ei tid der trakassering, undertrykking og AIDS-frykt var ein del av kvardagen.
Samankomsten mellom to vidt ulike grupper demonstrerer kor viktig det er å gi slepp på eigne fordommar, og heller prøve å bli kjent med menneske som er ulik ein sjølv.
Prislønt film
Pride hadde verdspremiere på filmfestivalen i Cannes i 2014. Her fekk han ståande applaus, og vann òg Queer Palm-prisen.
Filmen vart òg nominert til prisen for beste komedie eller musikal under Golden Globe-utdelinga i 2015. Han har òg vunne ei rekke andre prisar, både britiske og internasjonale.