Kven skal ha natriumredusert kost?
Natriumredusert kost blir nytta til personar som har høgt blodtrykk og mykje væske (ødem) i kroppen. Det kan vere ulike tilstandar som fører til opphoping av væske, som til dømes lever-, nyre- og hjartesvikt. Ved nyresvikt har kroppen problem med å skilje ut overflødig natrium, og dermed hopar det seg opp væske i kroppen ved inntak av mykje salt, og blodtrykket stig. Natrium bind vatn i kroppen, så når ein reduserer saltinntaket, blir det mindre væske i kroppen.
Ein kan òg nytte natriumredusert kost for å førebyggje desse sjukdommane.
Kosten kan lagast med ulik mengde natrium, alt etter sjukdomstilstand:
- 5 gram salt per dag
- 2 gram salt per dag
Ikkje tilset salt under tillaging eller på ferdige retter til pasientar som skal ha 2 gram salt per dag.
På matvaretabellen.no kan du sjekke saltinnhaldet i ulike varer.
Ernæringsmessige konsekvensar
Ved enkelte sjukdomstilstandar kan ein få dårleg matlyst. Saltfattig kost smakar mindre, og har ein dårleg appetitt, kan inntaket av mat bli for lite og det kan dermed bli for lite av energi og næringsstoff.
Pasienten vil gradvis venne seg til mindre salt i maten og etter kvart kjenne smakane av andre råvarer. I denne kosten er det som alltid viktig å hugse på at pasienten et med auga først.
Hugs
Til ein kost med redusert saltinnhald er det gunstig å nytte reine råvarer, og heller tilsetje salt når ein lagar til maten.
Natriumredusert kost blir òg kalla saltredusert kost, og nemningane blir nytta om kvarandre i institusjon.
