Frå KRLE til religion og etikk

Hovudmålet med faget religion og etikk er at du skal forstå deg sjølv, andre og verda rundt deg. Du skal òg bli i stand til handtere mangfald og ueinigheit. For å få til dette må du utvikle kunnskapar om religionar og livssyn, og du må trene deg på å reflektere over etiske og eksistensielle spørsmål. På denne måten kan du bli i stand til å meistre livet, bli ein ansvarleg medborgar og bidra til eit berekraftig samfunn.

Det er altså ikkje småtteri som er forventa av deg som elev i religion og etikk. "Religion og etikk har eg jo hatt om i 10 år allereie", tenkjer du kanskje? Forhåpentleg har du eit godt grunnlag frå KRLE-timane, men i faget du skal ha no, tek vi det heile til eit nytt nivå.

Faget religion og etikk byggjer vidare på KRLE-faget du hadde på grunnskulen. På vidaregåande er faget lagt til vg3 i studieførebuande utdanningsprogram. Dette inneber at forventningane til deg som elev er ein del høgare enn då du lærte om desse temaa sist. Det at du no er eldre, inneber at du har meir livserfaring, du kan reflektere over meir avanserte spørsmål, og du kan analysere og forstå vanskelegare samanhengar.

Det at du gjennomfører eit studieførebuande utdanningsprogram, inneber dessutan at du skal ha ei meir vitskapleg tilnærming til faget – du skal begynne å tenkje som ein student. Derfor skal du lære om teoriar og bruke dei til å analysere, samanlikne, finne samanhengar og gjere eigne vurderingar. Du skal òg bli flink til å finne og vurdere kjelder og bruke dei på rett måte.

Utdanningsdirektoratet. (2020). Fagets relevans og sentrale verdier. Læreplan i vg3 religion og etikk (RLE01‑03). Fastsett som forskrift. Læreplanverket for Kunnskapsløftet 2020. https://www.udir.no/lk20/rle01-03/om-faget/fagets-relevans-og-verdier