Dikt, forteljingar og skodespel, men også saktekstar, gir oss innblikk i korleis menneske har levd, tenkt og følt til ulike tider. Leseopplevingar kan gjere oss glade, ettertenksame, triste eller sinte – og alltid litt klokare!

Litteraturen blir forma av forfattarar, og han blir prega av tida han blir skriven i. Lær om utviklinga gjennom tidene, om litterære retningar og om forfattarane. Det er dette som er tekstane sin kontekst.

Modernisme er eit samleomgrep for ei rekkje ulike retningar og stilartar innanfor kunst, arkitektur, litteratur og musikk som har prega vestleg kultur frå rundt år 1900 og framover. Den modernistiske litteraturen eksperimenterer med form, og tekstane skildrar gjerne kjensla av å vere framandgjord.

I mellomkrigstida var det lite modernisme i Noreg. Men etter andre verdskrigen skreiv fleire norske forfattarar modernistisk. Tida var òg prega av den såkalla "tungetaledebatten", ein disputt mellom tradisjonalistiske og modernistiske forfattarar om kva som kjenneteiknar god litteratur.