Husdyra våre er ein del av gardsdrifta, og vi er avhengige av dei for å produsere mat. Derfor bruker vi samlenemninga produksjonsdyr om storfe, småfe, gris og fjørfe. Her finn du lærestoff som er felles for dei vanlegaste produksjonsdyra i Noreg.

Alle dyr kan bli sjuke, men målet er at dyra skal ha så god helse som mogleg. Dyrehelse avheng mykje av fôring og stell, og dette vil vi ta opp under kvart enkelt dyreslag. Det er òg viktig å vite litt om ulike mikroorganismar som kan føre til skade og sjukdom, slik at vi kan unngå smitte.

I dyrehald er vi òg avhengige av å kunne bruke vaksinar og antibiotikum, for dyra blir utsette for mange ulike virus og bakteriar. Vaksinar er viktig for å kunne førebygge sjukdommar, og antibiotikum kan vere livsviktig viss dyra får bakterieinfeksjonar.