Sikker jobb-analyse – SJA
Sikker jobb-analyse (SJA) blir brukt når det finst risikoelement som må kartleggast og vurderast før eit arbeidsoppdrag kan starte. Dette blir vanlegvis gjort i eit møte. Der skal områdeansvarleg, skiftleiar og utførande personell delta. Av og til deltek ein HMS-ansvarleg òg.
I møtet blir jobben delt opp og vurdert for risikoelement, som vil seie å identifisere kva som kan gå gale. Desse risikoane skal reduserast ved hjelp av tiltak. Vanlege tiltak for å redusere risiko er sperringar, sikring, vakthald, stenging av system, stopp i andre aktivitetar i nærleiken og så vidare. Det er slike tiltak som skal komme fram i analysen av arbeidet.
Risiko og tiltak skal førast inn i SJA-skjemaet, og deltakarane skal signere på SJA-en. Dei valde tiltaka skal gjennomførast før arbeidet kan starte. Kvar enkelt arbeidar skal likevel vere merksam og vurdere si eiga og andre si sikkerheit når jobben blir utført.
I SJA-prosessen blir det altså utført ein risikoanalyse. Vi vurderer kva som kan skje undervegs i arbeidet, kor stor konsekvens det kan få, og kor stort sannsyn det er for at det kjem til å skje. Mange bedrifter bruker ei risikomatrise i analysen.
Ein risikoanalyse blir berre god når alle deltek med si forståing og sine tankar om arbeidet som skal gjerast. Det er kompetansen din i faget som avgjer om jobben er godt nok analysert, om tiltaka er gode nok, og om risikoreduksjonen er god nok.
SJA-skjemaet krev at vi går gjennom planen for korleis jobben skal utførast, og alle skal prøve å finne moglege farar.
Kva kan gå gale?
Kva kan vi gjere for å forhindre dette?
Kva kan vi gjere for å redusere konsekvensane dersom det skjer?
Risikoen skal vurderast innan kategoriane sannsyn og konsekvens. Innan desse to kategoriane er det ulike nivå, som vist i døma under.
Alvorsgrad | Beskriving |
|---|---|
| Ubetydeleg skade | Dette nivået indikerer at hendinga eller situasjonen ikkje er forventa å føre til nokon skadar eller helseproblem for arbeidaren eller andre. |
| Mindre alvorleg skade | Dette nivået karakteriserer hendingar som kan føre til mindre skadar, som mindre kuttsår, skrammer eller blåmerke. Desse skadane er vanlegvis ikkje livstruande, men krev likevel førstehjelp. |
| Alvorleg skade | Hendingar på dette nivået kan resultere i meir alvorlege skadar som brot, forstuingar eller kutt som krev medisinsk behandling utover førstehjelp. |
| Svært alvorleg skade | Hendingar på dette nivået kan føre til livstruande skadar som alvorlege brot, indre skadar eller skadar som krev omgåande medisinsk nødhjelp. |
| Tap av liv | Dette er det mest alvorlege konsekvensnivået og indikerer at hendinga kan føre til dødsfall. |
Hyppigheit | Beskriving | Sannsyn |
|---|---|---|
| Svært sjeldan | Dette betyr at det er ekstremt lite sannsynleg at hendinga eller situasjonen som blir vurdert, vil skje. I praksis skjer hendinga aldri, og det er svært usannsynleg at ho vil gå føre seg i løpet av ein stor tidsperiode. Det krev normalt ikkje ekstra sikkerheitstiltak, for risikoen er minimal. | 0–5 % |
| Sjeldan | Dette betyr at det er lite sannsynleg at hendinga eller situasjonen skjer, men enkelthendingar kan oppstå. Det er ikkje vanleg, men det er mogleg at hendinga kan skje i løpet av ein viss tidsperiode. Det kan vere nødvendig å vurdere nokre grunnleggande sikkerheitstiltak for å minimere risikoen. | 5–20 % |
| Ofte | Dette betyr at det er moderat sannsynleg at hendinga eller situasjonen vil skje. Hendinga kan oppstå relativt regelmessig eller med ein viss frekvens. Det er viktig å setje i verk tiltak for å redusere risikoen og verne arbeidstakarane sidan det er ei reell mogelegheit for at hendinga kan skje. | 20–50 % |
| Svært ofte | Dette betyr at det er høgst sannsynleg at hendinga eller situasjonen vil skje. Hendinga skjer altså hyppig og regelmessig. Det er avgjerande å setje i gang omfattande sikkerheitstiltak for å minimere risikoen for skadar eller ulykker sidan hendinga er ein stadig nærverande trussel. | 50–100 % |
Du skal no ta for deg ein arbeidsoperasjon du skal gjennomføre på verkstaden, og gjennomføre ein sikker jobb-analyse med risikovurdering for denne arbeidsoperasjonen. Dette kan eksempelvis vere bruk av ei stor maskin, sveising, eit tungt løft eller bruk av kjemikal.
1. Kartlegg og vurder risiko
Du skal
kartlegge arbeidet som skal utførast
beskrive arbeidsoperasjonen
kartlegge ulike uønskte hendingar som kan oppstå
beskrive konsekvensen dersom den uønskte hendinga skjer
beskrive kor stort sannsyn det er for at hendinga kan skje
Bruk skjemaet under.
Filer
2. Fyll ut risikodiagram med fargeskala
Set nummera frå førre skjema inn i risikodiagrammet under.
Vurder kvart enkelt punkt med ein farge.
Filer
3. Utarbeid ein handlingsplan
Beskriv dei ulike risikoane du har avdekt.
Beskriv korleis du vil prioritere risikofaktorane.
Beskriv tiltak for å redusere risikoen.
Beskriv kven som er ansvarleg for å vareta sikkerheita ved kvar enkelt arbeidsoperasjon.
Bruk skjemaet under.
Filer
- Handlingsplan(PDF)