Om filmen
Den veganske tannbørsten er ein novellefilm som problematiserer haldningane dei vaksne har til klimakrisa. I filmen blir vi med til Lofoten og til skipet The World. The World er eit leilegheitsskip for nokre av verdas aller rikaste menneske. Reiarlaget som eig skipet, blir sagt å vere blant dei første i verda som har gått over til ei meir miljøvennleg energikjelde: ein miks av biodrivstoff, naturgass, diesel og batteri.
Rundt eit bord i eit kyrkjeliknande rom sit fleire vaksne i ein absurd samtale om klimaendringane. Velkjende argument om klimaspørsmål dukkar opp i ei ny og karikert form.
PR-sjefen i ei verdsleiande forskingsstifting fortel om arbeidet sitt. Stiftinga jobbar med å utvikle og promotere frie marknadsløysingar som kan komme ulike verdsproblem i møte. Ei dame frå Lofoten er om bord for å promotere rockering-retreaten sin.
Amelia (14) og Steven (12) sit og overhøyrer samtalen. Til slutt får dei nok av dei likegyldige vaksne og dei lettvinte løysingane deira på store komplekse problem.