Spirer

Det er fleire typar frø som kan nyttast til spiring. Vanlegast er mungbønnespirer og alfalfaspirer, men det er òg mogleg å skaffe spirer av andre typar bønner, erter eller linser, og såkalla krydderspirer, som er spirer av reddik, sennepsfrø, lauk og så vidare. Spirer har ein sprø konsistens, og dei fleste typane har ganske kraftig smak.

Vi kan kjøpe spirer i butikk heile året. Dei har avgrensa haldbarheit og bør bli oppbevarte i kjøleskap ved 8 gradar i maks fire dagar.

Vi nyttar som regel spirer rå, som pynt på smørbrød og i andre rettar. I omelettar og salatar smakar dei nydeleg. Bønnespirer kan òg få eit raskt oppkok og nyttast som tilbehøyr til kjøtt eller fisk. Bønnespirer passar utmerkt til wok, fordi dei held på den fine, sprø konsistensen. Dei andre spirene passar ikkje til oppvarming.

Spirer består av den konsentrerte næringa frå frøet og har eit mykje høgare innhald av mineral og vitamin enn ferdig utvikla plantar.

Sjå Matvaretabellen frå Mattilsynet for nærare opplysningar om næringsinnhaldet.

Spirer skal vere spenstige og saftrike, og dei skal ikkje vere visne eller for langt utvikla. Dei skal heller ikkje ha mugg eller rote.

I den korte filmen under kan du lære meir om spirer og få tips til korleis dei kan bli laga til og serverte.