Asparges, kvit

Den kvite aspargesen blir dyrka verna og tildekt med jord i heile vekstperioden og blir hausta når spissen kjem opp til overflata. Tjukkleik og lengde kan variere noko frå land til land. Den norske sesongen strekker seg frå april til juni.

Asparges er ei utsett vare og må vernast mot direkte lufttrekk og lys. Blir den kvite aspargesen fuktig, forsvinn den sprø konsistensen. Ideell lagringstemperatur er 2 til 4 gradar.

Kvit, lilla eller grøn asparges kan kokast og etast som forrett eller hovudrett. Asparges har svært aromatisk og fin smak og eignar seg derfor òg godt som tilbehøyr til steikt og røykt kjøtt og i fiskerettar. Den nedste delen av stilken, omtrent 1–2 cm, skal kuttast av før koking. Kvit og lilla asparges bør skrellast med potetskrellar nedst før bruk. Asparges blir kokt i 3–5 minutt avhengig av tjukkleiken. Det er ein fordel å bunte asparges saman med hyssing under koking, for då er det lettare å bevare stilkane heile.

Aspargesskota skal vere rette i forma og faste i konsistensen. Stilken skal vere saftfull, frisk og sprø, mens toppen skal vere tett og heil. Asparges skal ikkje vere treen eller ha mørke flekkar. Kvit asparges kan ha eit skjer av ein lys lilla farge. Storleiken på aspargesen seier ikkje noko om kvaliteten på vara.

Asparges er svært kalorifattig. Han inneheld noko kalsium, jern og fosfor i tillegg til vitamin A og C. Kvit asparges har mindre næringsverdi enn grøn. Asparges verkar vassdrivande.

Sjå Matvaretabellen frå Mattilsynet for nærare opplysningar om næringsinnhaldet.

I den korte filmen under kan du lære meir om asparges og få tips til korleis han kan bli laga til og servert.