Logos i medieuttrykk

Eit medieuttrykk med dokumenterte faktaopplysningar og eit bilete som viser resultatet, kan overtyde oss om at noko er riktig. Tenk berre på alle før- og etterbileta av kroppar som florerer i media og påstandar som "Drikk denne kaffien, så får du ny kropp på berre seks veker". Det er lett å la seg forføre av bilete som "bevis" at noko verkar.

I reklame blir det ofte spelt på appellforma logos for å overtyde målgruppa om at noko er fornuftig. Kioskkjeda 7-Eleven har tidlegare hengt opp informerande plakatar med påskrifta "Noreg er eitt av landa i Europa med flest tilfelle av klamydia".

Svaret er enkelt: 7-eleven ønskjer å opplyse om at dei sel kondom. Det gjer dei ved å leggje fram statistikk. Vi kan derfor seie at teksten i plakaten vektlegg appellforma logos. Statistikken er sannsynleg og appellerer til fornufta vår. På denne måten kan 7-Eleven vekke forståing for bodskapen sin, og samtidig minne om du kan kjøpe kondom i kiosken deira. Det er ein tydeleg og logisk bodskap.

I journalistikken kan vi òg finne eksempel på bruk av logosargumentasjon for å påverke mottakarane. I starten av 2020 fekk til dømes koronaviruset mykje medieomtale, og mange vart redde for å bli smitta. Media var til tider med på å forsterke frykta for koronaviruset.

I ein kommentar i Aftenposten skreiv journalist Joacim Lund at folk måtte roe ned den irrasjonelle frykta. Argumenta hans var logiske: "Vi må ikkje kjøpe munnbind på grunn av koronaviruset."

Han sikta til oppslaga om at apoteka var utselde for munnbind, og at folk oppsøkte tannlegen sin for å skaffe dei. Når vi tenkjer oss om, forstår vi at å hamstre munnbind kan verke noko hysterisk.

Dersom logosargumentasjonen din skal fungere, må du klare å beskrive verda på ein slik måte at mottakarane kjenner seg igjen. I tillegg må argumenta som du underbyggjer påstandane dine med, verke sanne eller sannsynlege. Først då kan mottakarane bli overtydde.

Lund, J. (2020, 27. februar). Vi må ikke kjøpe munnbind på grunn av koronaviruset. Langt ifra. Aftenposten. Henta frå https://www.aftenposten.no/meninger/kommentar/i/opQGjK/vi-maa-ikke-kjoepe-munnbind-paa-grunn-av-koronaviruset-langt-ifra-joacim-lund?