Det er mange måtar å organisere yrkesfagleg fordjuping (YFF) på, og kvar skule og linje har si eiga løysing på korleis YFF er lagt opp. I dette faget blir Vg1- og Vg2-elevar på yrkesfaglege linjer kjende med praksis og bransjen i faga dei ønsker å fordjupe seg i.
Tek utgangpunkt i læreplanmål frå Vg3/lærlingløpet
YFF gir elevane ei fin moglegheit til ta eigne val om kva fagområde dei vil fordjupe seg i. Fordjupinga må ta utgangspunkt i kompetansemåla frå læreplanane for læretida (Vg3). Nokre gjennomfører dette som utplassering i bransjen, andre jobbar med eigne prosjekt og fordjuping ved skulen, og nokre kombinerer fleire av arbeidsmåtane.
Nokre vanlege måtar å organisere YFF på
- utplassering
- jobbe praksisnært med ungdomsbedrift
- jobbe med eigne fordjupingsprosjekt
- førebu utplassering frå skulen med søknads- og CV-skriving
- praktisk opplæring og kursing ved skulane og ute i bransjen
- ein kombinasjon av fleire av punkta over
Nokre tips til deg som skal jobbe med YFF
- Finn ut kva lærefag og dermed Vg3-kompetansemål som er aktuelle for deg. Du finn læreplanane ved å søkje på faget på Utdanningsdirektoratet (Udir).
- Planlegging, dokumentasjon og loggskriving er viktig i yrkesfagleg fordjuping. Du må ha ein plan, knyte arbeid til kompetansemål og dokumentere prosessen undervegs. I etterkant skal du evaluere og skrive logg for å vise arbeidsprosessen.
- Skaff deg informasjon om yrket og retninga du vil fordjupe deg i. Kva slags eigenskapar bør du ha, korleis er arbeidsforholda, kva slags oppgåver kan du forvente deg?
Desse Vg3-fagene er aktuelle for elevar som går informasjonsteknologi og medieproduksjon
Per april 2020 ligg det an til å bli desse Vg3-tilboda (lærlingløp). Læreplanane er ikkje klare enno.
Informasjonsteknologi
- Vg3 IT-driftsfaget
- Vg3 IT-utviklarfaget
Medieproduksjon
- Vg3 medieproduksjonsfaget
- Vg3 mediedesignsfaget
- Vg3 medieteknikkfaget
Dersom du ønskjer å finne ut meir om YFF, kan du lese på Utdanningsdirektoratet sine sider om yrkesfagleg fordjuping.