Forsøk 1: UV-beskyttelse – ei innføring
Føremål
Føremålet med dette forsøket er å bli kjend med ulike typar solkrem vi kan få kjøpt i butikken, ved å studere innhaldsdeklarasjonen til solkremane.
Framgangsmåte
Jobb med éin solkrem om gongen, og undersøk emballasjen.
- Kva er dei viktigaste opplysningane på framsida av emballasjen?
- Gir solkremen beskyttelse mot UVA-stråling, UVB-stråling eller begge delar?
- Kva solfaktor har kremen?
- Kva er namnet på dei fem første inaktive ingrediensane i innhaldsdeklarasjonen?
- Når de har undersøkt solkremane, kan de prøve å gruppere solkremane ut frå type filter, aktive ingrediensar og faktor.
Systematiser opplysningane de finn. De kan til dømes bruke eit skjema med éi rad til kvar solkrem, slik som dette:
namn på solkremen | type solkrem | faktor | beskyttelse | beskyttar mot | aktive ingrediensar | inaktive ingrediensar |
---|---|---|---|---|---|---|
SunKid | for barn | 50+ | høg | UVA og UVB | titanoksid | vatn, glyserin, propylenglykol, di-isopropyl-sebacat, etylheksylsalisylat |
Diskusjon
- Kva sambindingar er det vanlegast å bruke som UV-filter (aktive ingrediensar)?
- Er dei aktive ingrediensane organiske eller uorganiske?
- Kva er dei vanlegaste ingrediensane i solkremar?
- Kor stor del av solkremane beskyttar mot UVA, UVB eller begge delar?
- Kva er forskjellen på UVA- og UVB-stråling? Kva kjende helseeffektar har desse strålingstypane?
- Kva meiner ein med solfaktor? Korleis bestemmer ein solfaktoren til ein solkrem?
- Kva er forskjellen på ein solkrem med faktor 30 og ein solkrem med faktor 50?
Forsøk 2: Lag dykkar eigen solkrem
Føremål
I dette forsøket skal de lage solkrem med to ulike solfaktorar.
Framgangsmåte
Lag krem utan faktor (basekrem)
Bland alle ingrediensar som høyrer til feittfasen, i eit 250 mL begerglas:
- 15 g lanettevoks
- 7 g mandelolje
- 7 g flytande parafin
- Set begerglaset i eit varmt vassbad.
- Bland ingrediensane ved å røre rundt med ein glasstav i 5 minutt. Lat begerglaset bli ståande i vassbadet.
Bland ingrediensane som høyrer til vassfasen, i eit anna 250 mL begerglas:
- 5 g glyserol
- 66 mL destillert vatn
- Bland saman ved å bruke ein glasstav.
- Medan feittfasen framleis står i vassbadet, heller du vassfasen over i feittfasen medan du rører rundt i 5–10 minutt, heilt til du har ei homogen blanding. Dette er utgangpunktet for solkremane de skal lage (basekremen).
- Lat begerglaset bli ståande i vassbadet.
Lag krem med solfaktor
Lag solfaktor ved å blande 2 g sinkoksid og 2 mL flytande parafin i eit begerglas på 50 mL.
Solfaktor 10
- Overfør 4,1 g av basekremen til eit 50 mL begerglas.
- Tilset 0,9 g solfaktor til basekremen, og bland ved å bruke ein glasstav. Dette gir ein solkrem med cirka 10 % sinkoksid og solfaktor 10.
Solfaktor 20
- Overfør 3,2 g av basekremen til eit anna 50 mL begerglas.
- Tilset 1,8 g solfaktor til basekremen, og bland ved å bruke ein glasstav. Dette gir ein solkrem med cirka 20 % sinkoksid og solfaktor 20.
Ta vare på solkremane de har laga. De skal bruke dei i det neste forsøket.
Diskusjon
- Kva for nokre ingrediensar er løyselege i vatn? Kva for nokre er løyselege i feitt? Forklar svara dykkar ved å bruke polariteten til stoffa.
- Kvifor er lanettevoks ein viktig ingrediens i oppskrifta?
- Kva kjenneteiknar ein emulgator? Kva kjenneteiknar emulsjonar?
- Kva er forskjellen på ein olje-i-vatn-emulsjon og ein vatn-i-olje-emulsjon?
- Finn to stoff som er emulgatorar, frå ingrediensane i forsøk 1.
Forsøk 3: Kor godt beskyttar solkremane?
Føremål
I dette forsøket skal de undersøkje kor effektive solkremane frå forsøk 2 er.
Framgangsmåte
Tips! I beskrivinga under bruker vi UV-perler for å påvise UV-stråling. Viss de har tilgang til ein UVB-sensor, kan det vere eit godt alternativ til UV-perler.
Sikkerheit!
Ikkje sjå rett inn i UV-lampa når ho er på. Berre skru på lampa når ho skal brukast.
- Legg fire UV-perler i midten av ei petriskål.
- Monter UV-lampa slik at ho er omtrent 20 cm unna petriskåla.
- Bruk ein spatel til å smørje ei ertestor mengd solkrem midt på plastarket eller glasplata, slik at solkremen dekkjer UV-perlene.
- Legg plastarket over perlene.
- Skru på UV-lampa, og lat ho lyse i fem sekund.
- Bruk fargeskalaen eller ein fargeapp til å registrere fargen på UV-perlene. Alternativt: Ta bilete av UV-perlene, og bruk biletet til samanlikning til slutt i forsøket.
- Legg UV-perlene i ein behaldar, slik at dei ikkje blir utsette for lys.
- Legg fire nye UV-perler i petriskåla.
- Gjenta forsøket med same type solkrem tre gonger.
Gjennomfør to kontrollmålingar:
- ei måling der de berre bruker eit reint plastark
- ei måling der de ikkje bruker plastark
- Samanlikn fargeintensiteten på UV-perlene for kvar solkrem, og samanlikn deretter med kontrollmålingane.
Konklusjon og diskusjon
- Kva konklusjon kan de trekkje av resultata dykkar?
- Stemmer resultata med tanke på solfaktoren på kremane?
Kva variablar er
- avhengige?
- uavhengige?
- faste?
- Kvifor må UV-perler berre brukast som ein peikepinn på kor effektive dei ulike solkremane er?
- Peik på viktige feilkjelder i forsøket.
Forslag til vidare arbeid
- Samanlikn solkremar frå ulike produsentar.
- Test om produksjonsdatoen påverkar kor effektive solkremane er.
- Bruk sollys som kjelde til UV-lys.
- Test ulike solbriller i staden for solkrem.
Denne sida er ei omarbeidd utgåve av "How effective is your sunscreen?" frå Science in School.