Føremål
I dette feltarbeidet skal de undersøkje om det finst levande organismar i snø.
Hypotesar
Lag hypotesar om liv i snøen før de går ut. Til dømes: «Stemmer det at vi får mark i magen av å ete snø?»
Framgangsmåte
- Gå ut og ta prøver av snø frå ulike område eller ulike lag i snøen.
- Lag mikroskoppreparat av snøvatnet, og undersøk om det inneheld liv. Teikn figurar, ta bilete, eller beskriv utsjånaden til levande materiale de observerer.
Estimer mengda levande materiale i synsfeltet ved 40 eller 100 gongers forstørring. Bruk desse kategoriane:
ingenting
opptil 10 individ
10–20 individ
fleire enn 20 individ
Undersøk om det skjer ei endring i snøvatnet om det får stå i romtemperatur over tid:
Overfør snøvatnet til behaldarar som kan dekkjast til med plastfolie eller lok slik at vatnet ikkje fordampar. La vatna stå ved romtemperatur. Lag mikroskoppreparat med nokre dagars mellomrom for å undersøkje om livet i vatnet endrar seg over tid.
Vidare arbeid
Undersøk bakteriane som er til stades, ved å bruke petrifilm eller utstryk på næringsagar.
Tel kor mange bakteriekoloniar det er etter eitt døgn i varmeskåp ved 37 °C.
Resultat
- Kor mykje levande materiale fann de på dei ulike lokalitetane?
- Lag ei oversikt over organismane de finn på dei ulike lokalitetane. Forsøk å finne ut kva for nokre systematiske grupper dei tilhøyrer. Legg inn bilete eller teikningar av organismane.
Konklusjon
- Vurder hypotesane de laga. Stemte dei? Forsøk å forklare kvifor eller kvifor ikkje.
- Korleis klarer organismane de har funne, å overleve i snøen?