Oppspenning av verktøy og arbeidsemne
Oppspenning av verktøy
Verktøyet kan festast med ulike metodar. Her vil vi forklare dei vanlegaste oppspenningsmetodane for dei ulike verktøya.
Planfresar
For planfresar er fresehovudet som oftast skrudd fast direkte på haldaren, medan dei enkelte skjera er skrudde fast på fresehovudet.
Pinnefresar
Pinnefresane finst i mange ulike storleikar. For å feste desse er det vanlegast å bruke ein spesiell, kraftig hylsekjoks med spennhylser som er tilpassa den pinnefresen du skal montere.
Ein hylsekjoks består av ein kjoks, ei spennhylse og ein spennmutter. Klikk på symbola i biletet for å lese meir om dei ulike komponentane – eller les fagteksten under biletet.
Spennmutter
Spennmutteren blir brukt til å stramme hylsa. Spennmutterane kan ha ulik utforming. På mindre hylsekjoksar har han gjerne ei sekskanta utforming, medan på større hylsekjoksar må du bruke spesielle hakenøklar for å stramme spennmutteren.
Spennhylse
Spennhylsene finst i mange ulike dimensjonar og diameterar, og det er viktig at du bruker ei spennhylse med ein indre diameter som samsvarer med det skjereverktøyet du skal montere.
Spindel
Spindelen er kopla til motoren på fresen og roterer når motoren er i gang.
Oppspenning av arbeidsemne
Arbeidsemnet kan festast på ulike måtar avhengig av forma på arbeidsemnet og arbeidet du skal utføre.
Det vanlegaste er å feste arbeidsemnet til fresebordet med ei maskinstikke.
Eit anna alternativ er å bruke spennhylser eller spennjern for å montere arbeidsemnet direkte på fresebordet.
Viss du skal utføre spesielle freseoperasjonar, kan arbeidsemnet også festast på spesialutstyr som er tilpassa freseoperasjonen, til dømes eit roterande fresebord eller eit delehovud.
