Visuelle konsept

Eit godt gjennomarbeidd konsept gir ei kjensle av profesjonalitet, identitet og soliditet. Konsept speler på kjenslene, meiningane og tankane til målgruppa for å få målgruppa til å knyte seg til produktet.

Nike sitt slagord "Just do it" frå 1988 dannar framleis grunnlaget for korleis Nike utformar reklame-kampanjane sine. Sjølv om dei har hatt mange ulike vinklingar på kampanjane sidan 80-talet, har dei alltid brukt menneske som vel å vere aktive.

CC BY-NC-SA

Bilete: Gorm Kallestad

Rema let i mange år slagordet "Det enkle er ofte det beste" gjennomsyre all reklame, men valde så å prøve ut konseptet "Det er 1000 grunner til å velge REMA 1000", der merksemda blir retta mot éi og éi årsak til å velje nettopp dei. Dette er døme på konsept som fullt ut pregar ansiktet til selskapet utetter. Få eit betre inntrykk av konseptet på Rema 1000s nettsider.

Eit visuelt konsept tydeleggjer temaet eller den grunnleggande logikken bak designet. Ei konseptbeskriving kan vere skriftleg, visuell eller begge delar. Ho gir retningslinjer for kva som skal gjere konseptet unikt og gjenkjenneleg i alle samanhengar og kanalar. Eit visuelt konsept er med andre ord ikkje ein bodskap, det er sjølve innpakninga – både visuelt og språkleg – som gjer bodskapen interessant, unik og lett å hugse.

CC BY-NC

Bilete: Damian Dovarganes

Både dataspel og brettspel er bygde på visuelle konsept som speglar identiteten til spelet. Anten ein ser logoen til spelet, ein av karakterane, spelverda eller ein reklameannonse for spelet, skal ein kjenne igjen kvar det kjem frå, og få dei rette assosiasjonane.

TV-program, seriar og filmar, festivalar og konsertar, konferansar og kurs har eigne visuelle tema. Hotell, kjøpesenter, flyplassar, museum, sjukehus og andre store bygningar har også konsept i botnen – som dannar grunnlag for korleis fasaden ser ut, val av fargar og materiale i interiøret og korleis innsjekkingsskranken, arbeidskleda, restaurantmenyane og dørskilta skal sjå ut. Det er også nokon som tenker tema og konsept når dei skal planlegge bryllaup, kjøpe interiør til heimen, pynte til høgtider eller ha fest.

CC BY-NC

Bilete: Stian Schløsser Møller

Dei norske pengesetlane er også baserte på eit konsept. Då Noregs Bank lyste ut ein design-konkurranse for dagens pengesetlar, var temaet "havets betydning for utviklingen av Norge". Dei braut då den lange tradisjonen med å ha portrett av kjende nordmenn som hovudmotiv på pengane.

Det kan ta litt tid å utvikle eit visuelt konsept, men dersom det knyter målgruppa tett til produktet, er det verdt den ekstra innsatsen. Visuelle konsept må gi ei god skildring av stilen som er ønskt, og skape gode assosiasjonar til produktet, arrangementet eller verksemda dei representerer. Utviklinga går i fasar, frå ein formlaus idé til ei presis beskriving med tydelege retningslinjer og visuelle døme. Undervegs er det lurt å ta imot råd frå målgruppa.

CC BY-NC-SA

Bilete: Henrik Sørensen

I utviklinga av eit konsept vil det vere mykje meir enn design som speler inn, som økonomi, logistikk, planlegging og arrangement. Sånt er det andre som tek seg av, til dømes ein prosjektleiar. Sjølv om det er nyttig å ha oversikt over heile konseptet, handlar konseptutvikling for ein grafisk designar om det reint visuelle.

Ofte presenterer kunden oppdraget i ei brifing. Kva er målet? Kva slags produkt ønsker og treng dei? Kva kanalar og format kan nyttast? Har konseptet eit namn eller slagord? Kven er målgruppa? Kva assosiasjonar skal det visuelle konseptet gi?