Gosse edtjh göökte teeksth viertiestidh dellie edtjh hedtieh jïh joekehtsh gaavnedh teeksti gaskem. Lohkh guktie datne maahtah dam darjodh.
Teeksth viertiestidh
Gosse datne edtjh göökte teeksth viertiestidh, dellie edtjh teeksti hedtieh jïh joekehtsh gaavnedh.
Gaavnh hedtieh jïh joekehtsh
Voestegh edtjh hedtieh gaavnedh. Ohtsedh mah seammalaakan gåabpegen teekstine.
- Seamma teema teekstine?
- Seamma vierhkie-vierhtieh teekstine?
- Teeksth seamma sjangerisnie?
- Teeksth seamma tïjjeste?
Teeksth seamma dïjrem utnieh?
Dan mænngan edtjh joekehtsh gaavnedh:
- Teeksth teemam joekehtslaakan gïetedieh? Jis numhtie guktie?
- Mah vierhkie-vierhtieh tjaelijh nuhtjieh? Akte tjaelije vierhkie-vierhtieh nuhtjie mejtie ij dïhte mubpie tjaelije nuhtjh? Jis numhtie mah vierhkie-vierhtieh?
- Teeksth joekehts sjangerinie? Jis numhtie mah joekehtsh dej gaskem?
- Jis eah teeksth seamma tïjjesne, guktie datne dam vuajnah? Gaavnh vuesiehtimmieh teestijste.
- Jis ij dïjre seammalaakan, mij dellie joekehtse?
Viertiestimmie-vuekie
Gosse datne edtjh viertiestimmie-analysem tjaeledh, dellie maahtah göökte vuekiej mietie barkedh. Veeljh aktem daejstie vuekijste.
Voestegh teekste A jïh dellie teekste B
- Tjaelieh aalkoem gusnie datne gåabpegi teeksti motijvem jïh teemam åehpiedahtah jïh dam maam vihkielommes. Mah seamma teekstine
- Åehpiedehtieh vierhkie-vierhtieh åenehkslaakan, maam datne teekstesne A gaavnih, jïh guktie vierhkie-vierhtieh viehkiehtieh teemam bigkedh
- Åehpiedehtieh vierhkie-vierhtieh åenehkslaakan, maam datne teekstesne B gaavnih, jïh guktie vierhkie-vierhtieh viehkiehtieh teemam bigkedh
- Guhkebe viertiestimmie-boelhke gusnie datne vuesiehtimmide teeksteste A jïh B viertesth. (daennie biehkesne gellie boelhkh, mujhtieh dam maam seammalaakan jïh mahte seammalaakan meatan vaeltedh )
- Konklusjovne
Tsiehkeste tseahkan viertiestidh
- Tjaelieh aalkoem gusnie datne motijvem jïh teemam teekstijste åehpiedahtah. Tjaelieh aaj teeksti hedtiej bïjre.
- Tjaelieh aktem hedtien bïjre. Vaeltieh meatan vuesiehtimmieh gåabpegen teekstijste, jïh guktie daate hedtie maahta mijjem tsevtsedh guktie mijjieh teekstem guarkebe.
- Tjaelieh akten orre hedtien bïjre. Vaeltieh meatan vuesiehtimmieh gåabpegen teekstijste, jïh guktie daate hedtie maahta mijjem tsevtsedh guktie mijjieh teekstem guarkebe. (Datne maahtah gellie hedtiej bïjre tjaeledh, men aellieh fer jïjnjh meatan vaeltieh)
- Tjaelieh buerkiestimmiem gusnie kontrasth teeksti gaskem vuesehth. Mujhtieh vuesiehtimmieh gåabpagijstie teekstijste meatan vaeltedh.
- Konklusjovne
Vuekie Tsiehkeste tseahkan viertiestidh nov sån maahta geerve årrodh. Men jis haarjenh, dellie gujht hijven gåarede. Vuekie datnem viehkehte mujhtedh guktie datne edtjh teekstide viertiestidh abpe dov vaestiedassesne, jïh dellie dov vaestiedasse buerebe sjædta.