I eit tverrfagleg samarbeid er alle rollene viktige. Nokre har spisskompetanse innanfor eit bestemt fagområde, som for eksempel ein psykolog eller ein lærar. Andre har kompetanse til å sikre meir heilheitleg omsorg og service og følgjer i tillegg opp behandling og tiltak som spesialistane har tilrådd. Han eller ho som har direkte kontakt med brukaren i det daglege, har ei særleg plikt til å observere og melde frå når noko ikkje stemmer. Dette kan for eksempel vere at tiltak som er sette i verk, ikkje fungerer som forventa.
I eit tverrfagleg samarbeid er det viktig at du er bevisst på din eigen og andre sin kompetanse. Du må vite kva du sjølv har kompetanse og myndigheit til å utføre, og kva du skal overlate til andre.
Dersom eit tverrfagleg samarbeid skal fungere, må ein ha tillit til kvarandre og den kompetansen samarbeidspartnarane har. Det er viktig å lytte til kvarandre. Samtidig er det viktig at du bidreg med den kompetansen du sjølv har.