Systematisk HMS-arbeid
I Noreg er helse, miljø og sikkerheit (HMS) sentralt for å skape eit godt og sikkert arbeidsmiljø.
Arbeidsmiljøet er summen av dei fysiske, psykiske, sosiale og organisatoriske forholda på ein arbeidsplass. Krava til HMS-arbeidet skal sikre eit arbeidsmiljø som gir grunnlag for ein helsefremjande og meiningsfylt arbeidssituasjon.
Tenk over
Kva slags arbeidsmiljøutfordringar kan finnast innan kokk- og servitørfaga?
Utarbeide eit HMS-system
Dei som driv serverings- og overnattingsstader, har ansvar for sikkerheita til tilsette og gjestar, og må sørgje for at det ikkje skjer skadar på omgivnadene. Det er derfor viktig at bedrifta har eit ordentleg HMS-system som har kartlagt risikoen for farar, og beskriv kva som må gjerast viss det oppstår farlege situasjonar.
Arbeidstilsynet tilrår å følgje desse trinna når bedrifta skal utarbeide eit system for å følgje opp helse, miljø og sikkerheit:
- Arbeidsgivaren har ansvaret for HMS, men det er viktig å samarbeide med arbeidstakarane.
- Skaff ei oversikt over kva lover og forskrifter som er aktuelle for bedrifta.
- Skaff ei oversikt over kva sikkerheitsrutinar for opplæring, brannøvingar, bruk av verneutstyr og så vidare som allereie finst i bedrifta.
Kartlegg bedrifta med tanke på risiko. Ein enkel risikoanalyse består av tre enkle spørsmål:
Kva kan gå gale?
Kva kan vi gjere for å forhindre det?
Korleis kan vi redusere konsekvensane viss det likevel skulle skje?
- Lag på bakgrunn av kartlegginga ein handlingsplan som viser kva som skal gjerast, kven som skal gjere det, og når det skal vere gjort.
Kontroll av HMS-systemet
Arbeidstilsynet skal kontrollere at bedrifta overheld HMS-reglane. Dei tek stikkprøver og kjem på tilsynsbesøk eller gjennomfører ein meir omfattande gjennomgang av heile HMS-systemet i bedrifta. Ved brot på regelverket kan styresmaktene gi bedrifta pålegg om å rette opp forholdet innan ein viss frist. Bedrifta kan òg måtte betale dagbøter inntil forholdet er retta opp.
I alvorlege tilfelle kan det òg bli snakk om forureiningsgebyr og politimeldingar. Mange kundar og leverandørar stiller krav til HMS. Gode HMS-rutinar kan òg ha betydning for forsikringspremien, mens mangelfulle rutinar kan føre til problem med forsikringsoppgjer viss det oppstår skadar.
Kjelde
Arbeidstilsynet, (u.å.). Internkontroll – systematisk arbeid med helse, miljø og sikkerhet. Henta 16. mars 2022 frå https://www.arbeidstilsynet.no/hms/internkontroll/