Digitale verktøy i praksis

I kvardagen kan digitale verktøy vere ei kjelde til leik, undring og utforsking som støttar opp om læringsprosessane til barna.

I samfunnet i dag er digital kompetanse naudsynt. I skulen er det ein del av basisferdigheitene som vi ønskjer at barna utviklar. Barn og unge må derfor få høve til å utvikle kunnskapen, ferdigheitene og haldningane sine (digital dømmekraft) i det å nytte digitale verktøy. Vi må derfor leggje til rette for at barn får utforske, prøve ut og øve på ulike digitale verktøy gjennom leik og aktivitetar.

Det er viktig at vi vaksne har kjennskap til ulike digitale verktøy og har kompetanse om dei verktøya vi tek i bruk. Derfor må vi setje oss inn i dei og vurdere korleis dei kan nyttast i leik og aktivitetar, til utforsking og til skapande og kreative prosessar. Saman med barna kan vi utforske dei ulike digitale verktøya.

Vi skal nytte digitale verktøy i arbeidet med barn og unge, men det krevst at vi vaksne har eit godt blikk og klarer å vurdere om bruken bidreg til det vi ønskjer. Viss barna blir passive og ikkje får høve til å utforske og skape noko sjølve, oppnår vi ikkje målet. Derfor skal vi nytte digitale verktøy med omhug og heile tida vurdere om bruken er i tråd med målet og med det lovverket som gjeld for barnehage og SFO.