Å arbeide på dagsenter

Tilbod om dagsenter varierer frå kommune til kommune. Organisering og innhald vil òg variere frå kommune til kommune og ut frå bistandsbehovet hos dei som får tilbodet.

Dagsentera har ulike målgrupper, og kommunane blir oppmoda til å unngå uheldige blandingar av målgrupper ved etablering av dagaktivitetstilbodet. I dag finst det mellom anna dagsenter som er reserverte for personar med utviklingshemming, funksjonsnedsetjing, somatisk eller psykisk sjukdom eller personar som har utfordringar med rus. I tillegg er det òg dagsenter reserverte for eldre og eldre med demens.

Felles for alle dagsenter er at aktivitetane blir tilpassa behova, interessene og ressursane til den enkelte.

Dette er eit organisert og tilpassa tilbod på dagtid for personar med utviklingshemming. Det skal bidra til eit aktiv og meiningsfylt tilvære i fellesskap med andre.

Organiseringa av dagtilbodet vil variere ut frå individuell tilrettelegging og tilpassing til behova til den enkelte. Det blir teke omsyn til interessene og ferdigheitene, humøret og dagsforma til deltakarane. Tilbodet kan innehalde

• produksjon og arbeidsprega aktivitetar

• kunst- og handverksproduksjon

• habilitering, opptrening og pedagogiske formål

• aktivitetar knytte til merkedagar

• matlaging og måltid saman med andre

• kulturelle tilbod som besøk på museum, teater, kino, utstillingar eller konsertar

• fysisk aktivitet og rørsle, turar og utflukter

• sosiale samlingar

Aktivitetane og treninga kan gå føre seg individuelt, men det kan òg leggast til rette slik at brukarane kan utføre aktivitetar i ein sosial fellesskap.

Dagsenter for eldre er eit aktivitetstilbod for eldre som har behov for innhald og aktivitetar i kvardagen. Dette kan til dømes vere på grunn av einsemd, som ledd i rehabilitering, ved behov for tilsyn og oppfølging og som avlasting for pårørande. Tilbodet på dagsenteret blir gitt ut frå interessene og behova til brukarane.

Dagsenteret kan gi tilbod om

• sosialt samvær og samtalar

• måltid som frukost og middag

• ernæringsrettleiing

• aktivitets- og kulturtilbod i ein sosial fellesskap

• opptrening, rehabilitering/habilitering

• trening i aktivitetar i dagleglivet

• ulike andre aktivitetar tilpassa moglegheitene og ønska til den enkelte

• fysiske aktivitetar og turar i nærmiljøet tilpassa årstida

• markering av ulike høgtider

Frå 1. januar 2020 har kommunane plikt til å tilby dagaktivitetstilbod for personar med demens. Dagtilbod til personar med demens inneber avlasting for pårørande og betyr at personen kan bu heime lenger. Formålet med tilbodet er at menneske med demens får moglegheit til å møtast sosialt og utføre aktivitetar dei liker å halde på med, og slik bidra til at dei får meiningsfylte dagar.

Aktivitetane skal tilpassast den enkelte slik at dei skal få halde på med aktivitetar dei liker og opplever som nyttige. Aktivitetane bør stimulere til at deltakarane får bruke både hovud og kropp, og til at dei får ein sosial fellesskap.

Aktivitetar kan til dømes vere

• å lese aviser og snakke om dagens nyheiter over ein kopp kaffi

• samtalar og refleksjonar

• quiz, kryssord, sudoku, kortspel og bingo

• musikk, song og dans

• sansestimulering

• ulike former for gymnastikk og rørsle for å auke funksjon, styrke og balanse, ulike ballspel og bowling

• turar og uteaktivitetar i nærområdet

• hagestell, ved-arbeid, landskapspleie, kontakt med dyr

• vedlikehald av bygningsmasse, snikring, møbeltapetsering

• utflukter med besøk på museum, konsert og utstilling

• kunst- og handverksprega aktivitetar som måling, strikking, keramikk og snikring

• matlaging og baking med felles måltid etterpå

I arbeidet på eit dagsenter, der du skal vareta og legge til rette for trivsel og gode aktivitetsmoglegheiter, omfattar arbeidet mellom anna at du som fagarbeidar

• tek omsyn til mennesket du møter, som eit menneske med eigne kjensler, opplevingar, ønske og vilje

• ser kvart enkelt menneske som unikt, ser kapasiteten og personlegdommen, interessene og aktiviteten til den enkelte

• er lydhøyr og merksam for behova og signala til enkeltmennesket

• etablerer ein omsorgsfull relasjon preget av nærleik, innleving og at du er lydhøyr

• skaper tryggleik, tillit og trivsel i samvær med andre

• viser empati og oppfattar og forstår ulike situasjonar og kulturar

• kommuniserer godt og tilpassar kommunikasjonen til kvart enkelt menneske, og at du tek i bruk ulike kommunikasjonsformer når det er nødvendig, til dømes ASK (alternativ og supplerande kommunikasjon). Det kan mellom anna innebere bruk av handteikn, kommunikasjon gjennom sansestimuli og berøring, bruk av kommunikasjonsmiddel som peiketavle, grafisk kommunikasjonsbok, talemaskin, materielle symbol, omsetjing og tolking av kroppsspråk, mimikk, gestar og liknande.

• legg til rette for, hjelper, rettleier og motiverer til daglege aktivitetar i kvardagen ut frå erfaringane og interessene til brukaren

• gir råd og rettleiing om kosthald og ernæring

• har kunnskap om ulike diagnosar

• stimulerer til brukarmedverknad og brukarstyrte aktivitetstilbod

• har sjølvinnsikt og forståing for korleis eigen veremåte påverkar samspel

• gjennomfører etisk refleksjon, slik at du kan utforske situasjonen frå fleire sider, for å få fram nye perspektiv og moglege løysingar

Helsedirektoratet. (2022, 8. mars). Gode helse- og omsorgstjenester til personer med utviklingshemming. Nasjonal veileder. https://www.helsedirektoratet.no/veiledere/gode-helse-og-omsorgstjenester-til-personer-med-utviklingshemming

Helsenorge. (2019, 10. september). Dagtilbud. https://www.helsenorge.no/hjelpetilbud-i-kommunene/dagtilbud/

Nasjonalt senter for aldring og helse. (u.å.). Dagaktivitetstilbud. Henta 5. juni 2022 frå https://www.aldringoghelse.no/demens/a-leve-med-demens/hverdagen-etter-diagnosen/dagaktivitetstilbud/